भुटानी शरणार्थी प्रकरणमा ठुला नेता छुट्दै गर्दा ‘मानव तस्करी’ प्रकरणमा समातिए कांग्रेसकै तल्ला नेता

काठमाडौं । नक्कली भुटानी शरणार्थी प्रकरणमा पक्राउ परेका कांग्रेसका माथिल्ला तहका नेताहरू छुट्दै गर्दा ‘मानव तस्करी’ प्रकरणमा कांग्रेसकै तल्ला तहका नेताहरू पक्राउ पर्न थालेका छन् ।

नक्कली कागजपत्र बनाएर भिजिट भिसामा विदेश पठाउने एक जना कांग्रेसका क्षेत्रीय नेता पक्राउ परेका हुन् । उनी तथा ट्राभल्स सञ्चालक पनि हुन् ।

ललितपुरको महालक्ष्मी नगरपालिका–४ इमाडोलस्थित सिटी टुर्स एन्ड ट्राभल्सका सञ्चालक ४५ वर्षीय विनोद कार्कीलाई उपत्यका अपराध अनुसन्धान कार्यालयको टोलीले पक्राउ गरेको हो ।

कार्की मोरङको पथरीशनिश्चरे नगरपालिका–७ निवासी हुन् । उनी नेपाली कांग्रेसका नेतासमेत हुन् ।

२०७९ मा भएको प्रदेशसभा निर्वाचनमा कार्की मोरङ क्षेत्र नम्बर २ को प्रदेश २ बाट प्रदेश सांसदमा उठेका थिए । तर, त्यसबेला नेकपा एमालेका लिलाबल्लभ अधिकारीसँग पराजित भए ।

काठमाडौँ उपत्यका अपराध अनुसन्धान कार्यालयका प्रहरी उपरीक्षक रवीन्द्र रेग्मीका अनुसार कार्कीले नक्कली कागजातका आधारमा सेटिङ मिलाएर भिजिट भिसामा विदेश पठाई मानव तस्करीमा सहयोग गर्दै आएका थिए ।

कार्कीलाई पुस ५ गते काठमाडौँको बल्खुबाट पक्राउ गरी थप अनुसन्धानका लागि प्रहरी परिसर टेकु पठाइएको छ ।

भिजिट भिसामा विदेश जान लागेका युवा युवतीहरूको शंकास्पद कागजातसहित गत असोज १७ देखि हालसम्म १ हजार ५१३ थान राहदानी त्रिभुवन अन्तर्राष्ट्रिय विमानस्थल सुरक्षा कार्यालयले नियन्त्रणमा लिएको छ ।

जसमा २४६ कागजातमा प्लस्टुको नक्कली प्रमाणपत्र पनि छ । यस्तै श्रम स्वीकृति, नाता प्रमाणित, प्रहरी रिपोर्ट र बैंक स्टेटमेन्ट पनि नक्कली पाइएको छ ।

तीन कागजपत्र बनाउने व्यक्तिहरूको पहिचानका क्रममा एजेन्ट, कन्सलटेन्सी र ट्राभल्स एजेन्सीहरूले एयरलाइन्सलाई प्रतिव्यक्ति १० देखि १५ हजारसम्म तथा अध्यागमनलाई प्रतिव्यक्ति ४० देखि ५५ हजारसम्म दिएर विदेश पठाउने गरेको अनुसन्धानले देखाएको छ ।

यस प्रकरणमा प्रहरीले अध्यागमनका कर्मचारीसहित सेटिङमा संलग्नलाई पक्राउ गरेर अनुसन्धान गरिरहेको छ ।