केपी ओली कप क्रिकेटमा सुदूपश्चिमले पुलिसलाई हरायो

काठमाडौं। केपी ओली कप टी–२० क्रिकेट प्रतियोगितामा सुदूरपश्चिम प्रदेशले नेपाल पुलिस क्लबलाई पराजित गरेको छ।

पोखरा रंगशालामा मंगलबार भएको खेलमा सुदूरपश्चिमले पुलिसलाई ४ विकेटले पराजित गरेको हो। १५९ रनको लक्ष्य सुदूरपश्चिमले १८.४ ओभरमा ६ विकेटको क्षतिमा पूरा गर्यो।

सुदूरपश्चिमका लागि किरण थगुन्नाले अविजित ५१ रन बनाए। उनले ३४ बलमा ४ चौका र २ छक्का प्रहार गरे। नरेन साउदले भने ३० बलमा ५ चौका र १ छक्का प्रहार गर्दै ३९ रन बनाए। पुलिसको लागि राशिद खानले ३, सागर ढकाल र सुनिल धमलाले १–१ विकेट लिए।

पहिले ब्याटिङ गरेको पुलिसले पूरै ओभर खेलेर ४ विकेटको क्षतिमा १५८ रन बनायो। पुलिसको लागि कुशल भूर्तेलले ५१ बलमा ५ चौका र ५ छक्का प्रहार गर्दै ६७ रन बनाए। सुनिल धमलाले ४० बलमा २ चौका र २ छक्का प्रहार गर्दै ४२ रन जोडे। सुदूरपश्चिमको लागि विकास आग्रीले २ तथा भोज राज भट्ट र बसन्त खत्रीले १–१ विकेट लिए।

पुलिस पराजित भएपनि उच्च रनरेट भएको मधेस प्रदेश समूह सीको विजेता बन्दै सेमिफाइनल पुगेको छ।