दुर्गा प्रसाईं र युवासंघको ‘फोहोरी ब्याटल’, एकैदिन एकैठाउँमा गरिने कार्यक्रममा के होला ?

काठमाडौं । मेडिकल व्यवसायी दुर्गा प्रसाईं एकताका माओवादीनिकट रहेर अध्यक्ष प्रचण्डका परम् विश्वास पात्र थिए । अध्यक्ष प्रचण्डकाे दाहिना थिए उनी । माओवादी पङ्क्तिका खुबै प्यारा थिए ।

उनै प्रसाईं पछि एमालेमा लागे । अध्यक्ष केपी शर्मा ओलीले उनलाई १० औँ महाधिवेशनमा केन्द्रीय सदस्य नै बनाइदिए । एमाले पङ्क्तिले उनलाई आफ्नै ठाने, माओवादीले पराई ।

मापदण्ड मिचेर केन्द्रीय सदस्य बनाइयो । उनी केन्द्रीय सदस्य बनेपछि बढी चर्चा र विवाद भयो । एमालेमा अवसर नपाएका नेता कार्यकर्ता असन्तुष्ट बने । तर, ओली निकटका नेताहरूले उनलाई केन्द्रीय सदस्य बनाउनुको कारणबारे प्रष्ट्याउँदै अध्यक्ष ओलीको बचाउ गरे ।

केही महिनापछि उनै दुर्गा प्रसाईं राजावादी आन्दोलनमा लागे । पूर्वराजा ज्ञानेन्द्र शाहलाई बोलाएर अभियान उद्घाटन गरे । प्रचण्ड र ओलीको संरक्षणमा लामो समय रहेका उनी नेकपा एकताको बेलामा चर्चामा थिए । आफ्नो घरमा ओली र प्रचण्डलाई बोलाएर मार्सी भात खुवाएको फोटो खुबै भाइरल थियो ।

तर, उनी एकपछि अर्काे गर्दै दुवै जनालाई छाडेर वर्तमान व्यवस्था उल्ट्याउने भन्दै आन्दोलनमा छन् ।

उनै प्रसाईंको नेतृत्वमा यही मंसिर ७ गते बिहीबार काठमाडौंमा जनप्रदर्शन घोषणा गरिएको छ । ‘बृहत् नागरिक मुक्ति आन्दोलन’ नाम दिइएको यो प्रदर्शनका लागि देशभरबाट मानिसहरू काठमाडौंमा ओइरिने दाबी प्रसाईंले गरिरहेका छन् । राजतन्त्रको चर्को वकालत गर्दै आएका प्रसाईंले संघीयताको खारेजीसहित जनजीविकाको मुद्दा उठाएका छन्।

कतिपयले भने उनले लिएको करोडौँको ऋण नतिर्न बडो चातुर्यताका साथ त्यसैमा ‘बैंक र वित्तीय संस्थाको ज्यादती’ को शब्द मिसाइदिएको बताउँछन् । आफूले लिएको ऋण नतिर्ने उद्देश्यको अराजक अभियान रहेको कतिपयले टिप्पणी गरेका छन् ।

त्यही दिन नेकपा (एमाले) को भ्रातृ सङ्गठन युवा संघ नेपालले पनि प्रदर्शन गर्ने घोषणा गरेको छ। एकै ठाउँमा दुई ‘दुश्मन’ को कार्यक्रम हुने भएपछि सुरक्षा निकायका लागि यो टाउको दुखाइ बनेको छ। सुरक्षा व्यवस्थालाई लिएर गृह प्रशासन निरन्तर छलफलमा रहेको स्रोतले बतायो । प्रधानमन्त्री प्रचण्डले शुक्रबार तीन वटै सुरक्षा निकायका प्रमुखलाई बोलाएर यसबारे छलफल गरेका थिए ।

स्रोतले भन्यो, ‘‘प्रधानमन्त्रीले देशको गणतन्त्र विरोधी शक्तिहरूको गतिविधिबारे चासो राख्नुभएको थियो । खासमा दुर्गा प्रसाईंको आन्दोलनको विषयमा केन्द्रित थियो । सुरक्षा तयारीको विषयमा पनि प्रधानमन्त्रीले चासो थियो ।’’

आवश्यकता परे निषेधाज्ञा

पछिल्लो समय एमाले भातृसंगठन युवा संघका पूर्व अध्यक्ष महेश बस्नेत र प्रसाईंबीच तल्लो स्तरको गालीगलौज चलिरहेको छ । दुईबीच सार्वजनिक कार्यक्रम, मिडिया र सोसल मिडियामा विष वमन चलिरहेको छ । ‘उनीहरूबीचको फोहोरी ब्याटलले’ सामाजिक सञ्जाल हेरिनसक्नु छ ।

युवा संघमा आवद्ध एक समूहले गत असोज २२ गते प्रसाईंलाई कालोमोसो दलेकाे थियाे । त्यसको केही दिनपछि झापाको एक कार्यक्रममा पुगेका बेला बस्नेतको गाडी प्रसाईंका कार्यकर्ताबाट तोडफोड भएको थियो । त्यसयता उनीहरूबीच दुस्मनी बढेको हो। दुवै जनाले कार्यक्रम एकै दिन, एकै ठाउँमा जुधाएपछि सुरक्षा निकायलाई तनावको विषय बनेको छ ।

युवा संघको कार्यक्रमको नेतृत्व एमाले नेता महेश बस्नेतले गरेका छन् । प्रसाईं पनि देशभरबाट मानिस लिएर सडकमा उत्रिने बताइरहेका छन् । प्रसाईंको आन्दोलनसँगै युवा संघको कार्यक्रमले झडपको स्थिति ल्याउन सक्ने विश्लेषण गरिएको प्रहरीका एक उच्च अधिकारी बताउँछन् ।

उनी भन्छन्, ‘‘बस्नेत र प्रसाईंबीच कालोमोसो दल्ने र एकअर्काेलाई क्षति पुर्‍याउने अवस्था आएको छ। सामाजिक सञ्जालमा एक अर्काप्रति आक्रामक छन् । ७ गते हुने भनिएको दुई पक्षको कार्यक्रमले थप झडप निम्त्याउने आँकलन छ ।’’

जसकारण आवश्यकता परे निषेधाज्ञा लगाउने तयारी गृह प्रशासनको छ । एक अधिकारी भन्छन्, ‘‘आन्दोलनमा सहभागी मानिसको उपस्थितिलाई आँकलन गरेर थप सुरक्षा रणनीति बनाउने छौँ । संयुक्त रूपमा सुरक्षाकर्मी परिचालन हुनेछन्। दुई पक्षबीच झडपको अवस्था देखिएमा निषेधाज्ञा लगाइन सक्नेछ ।’’

शनिबार पार्टी मुख्यालय च्यासलमा भएको कार्यक्रममा एमाले अध्यक्ष ओलीले प्रसाईंविरुद्ध आक्रोश पोखेका थिए । प्रसाईंको नाम नलिई ‘कसैकसै व्यक्तिलाई उभ्याएर प्रतिक्रियावादी शक्तिहरू देशभरबाट मान्छे उतार्न लागेको’ टिप्पणी गरेका थिए ।

उता प्रसाईं पनि आफूले ७ गते देखाइदिने भन्दै एमाले र महेश बस्नेतको निन्दा गरिरहेका छन् ।