सिक्किममा आएको बाढीमा परी २३ भारतीय सैनिक बेपत्ता

सिक्किम। उत्तरपूर्वी सिक्किम प्रान्तमा भीषण वर्षाका कारण आएको भीषण बाढीमा २३ सैनिक बेपत्ता भएका छन् ।

भारतीय सेनाका अनुसार उत्तर सिक्किमको ल्होनाक ताल फुटेर अप्रत्यासित रुपमा टिस्टा नदीमा बाढी आउँदा २३ सैनिक बेपत्ता भएको र केही सवारी साधन डुबेको छ । बेपत्ताको खोजी कार्य जारी रहेको भारतीय सेनाले बताएको छ ।

उक्त दुर्गम क्षेत्र नेपालसँग भारतको सीमा नजिक पर्छ । साथै, ल्होनाक ताल विश्वको तेस्रो सबैभन्दा अग्लो हिमाल कञ्चनजङ्घालाई घेरेको हिउँको चुचुरोमा रहेको हिमनदीको फेदमा अवस्थित छ ।

चुङथाङ्ग बाँधभन्दा माथि पानी छोडिएका कारण सामान्य अवस्थाभन्दा पानीको सतह पहिला नै १५ फिट माथि रहेको सेनाले बताएको छ ।

भारतीय सेनाका प्रवक्ताले जारी गरेको एउटा भिडियोमा जङ्गली क्षेत्रमा पानीको तीव्र धारले सडकहरू बगाएको र बिजुलीका तारहरू चुँडाएको देखाइएको छ ।

सामान्यतया भारतमा जुनदेखि सुरु भएर सेप्टेम्बरमा सकिने मनसुनको समयमा अचानक बाढी आउनु असामान्य हो । अक्टोबरसम्ममा मनसुनी वर्षा सामान्यतया सकिसकेको हुन्छ ।-रासस