शीर्ष नेताहरुको बैठक बस्दै, उच्चस्तरीय छानबिन समितिको मस्यौदालाई टुंग्याउने सम्भावना

काठमाडौं। सुन तस्करी छानबिनका लागि बनाउने उच्चस्तरीय समितिको मस्यौदा टुंगो लगाउन प्रमुख दलका शीर्ष नेताहरुको बैठक आज बस्दैछ ।

आज नेताहरुको बैठक बसेर मस्यौदालाई अन्तिम रुप दिने तयारी रहेको तर समय भने तय भइनसकेको नेताहरुले बताएका छन् ।

मंगलबार नै प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्ड, नेपाली कांग्रेसका सभापति र एमालेका अध्यक्ष केपी शर्मा ओली बसेर मस्यौदा टुंगो लगाउने तयारी थियो । तर विभिन्न कार्यक्रममा नेताहरु व्यस्त हुँदा बैठक बस्न सकेन । नेताहरु बसेर मस्यौदाको टुंगो लगाउन नसक्दा प्रतिनिधिसभाको बैठक समेत बस्न सकेको छैन ।

मङ्गलवार सिंहदरबारमा बसेको प्रमुख तीन दलका नेताहरू सम्मिलित कार्यदलले सुन तस्करी छानबिनका लागि उच्चस्तरीय छानबिन समितिको मस्यौदा तयार पारिसकेको छ ।

प्रधानमन्त्री पुष्पकमल दाहालले प्रचण्डले सोमवार बोलाएको सर्वदलीय बैठकमा सरकार सुन तस्करी प्रकरणको छानबिनका लागि उच्चस्तरीय समिति बनाउन सहमत भएपछि नेकपा एमालेका उपाध्यक्ष सुवासचन्द्र नेम्वाङ, नेपाली कांग्रेस प्रमुख सचेतक रमेश लेखक र नेकपा माओवादी केन्द्रका प्रमुख सचेतक हितराज पाण्डे रहेको कार्यदललाई त्यसको मस्यौदा तयार पार्ने जिम्मेवारी दिएको थियो ।

त्यही जिम्मेवारीअनुसार आफूहरूले मस्यौदा तयार पारेको र अब केही बेरपछि बस्ने सर्वदलीय बैठकमा पेस गर्न लागिएको माओवादी केन्द्रका प्रमुख सचेतक पाण्डेले बताए ।

प्रमुख प्रतिपक्ष एमालेले पछिल्लो सुन तस्करी प्रकरणको छानबिनका लागि उच्चस्तरीय समिति गठन गर्नुपर्ने माग राख्दै गएको साउन १० गतेदेखि संसद् बैठक अवरुद्ध गर्दै आएको छ ।

अब बस्ने सर्वदलीय बैठकले उच्चस्तरीय समितिको प्रारम्भिक मस्यौदामाथि छलफल गरी समितिको कार्यादेश र संरचना टुङ्गो लगाएपछि संसद् बैठक शुरु हुने नेताहरूले बताएका छन् ।