रास्वपाले गर्‍यो बझाङका संयोजकको निलम्बन फुकुवा

नेपालभ्युज

काठमाडौं। राष्ट्रिय स्वतन्त्र पार्टी (रास्वपा) ले पत्रकार सुनिल मण्डेललाई आक्रमण गरेको आरोप लागेका बझाङका संयोजक नगेन्द्र खड्काको निलम्बन फुकुवा गरेको छ ।

पार्टीको बिहीबार बसेको केन्द्रीय समितिको बैठकले छानविनका क्रममा खड्का दोषी नदेखिएकोले पदमा पुर्नबहाली गर्ने निर्णय गरेको महामन्त्री मुकुल ढकालले जानकारी दिए ।

यस्तै बैठकले रुपन्देहीमा पार्टी कार्यकर्ता विच भएको झगडामा संलग्न दामोदर खत्रीलाई तीन महिनाको लागि निलम्बन गर्ने निर्णय गरेको छ ।

ढकालका अनुसार बैठकले केन्द्रीय अनुशासन आयोगको नियमावली पारित गरेको छ । नियमावली पारित भएसँगै पार्टी हित विपरित कार्य गर्नेका लागि अनुशासनको कारबाही गर्ने विधि तय भएको उनले जनाए ।

यसैगरि बैठकले पार्टी दस्तावेज तयार गर्नका लागि १७ जनाको टोलीलाई गाउँ पठाउने निर्णय गरेको छ । टोली १५ दिन जनता माझ गएर मतदाताको अपेक्षा बुझ्ने बताइएको छ ।