एक वर्षपछि कांग्रेस केन्द्रीय समितिको बैठक आज बस्दै, देउवालाई र्‍याखर्‍याख पार्ने गगन समूहको तयारी

काठमाडौं । सत्तारुढ दल नेपाली कांग्रेसको केन्द्रीय समितिको बैठक एक वर्षपछि आज मंगलबारदेखि सुरु हुँदैछ ।

बैठक मंगलवार दिउँसो १ बजे पार्टी केन्द्रिय कार्यालय सानेपामा बस्नेगरी बोलाइएको छ । सोमबार बसेको पदाधिकारी र पूर्वपदाधिकारी बैठकमा बैठकको प्रत्यक्ष प्रशारण गर्ने सम्बन्धमा पनि छलफल भएको थियो ।  आजको बैठक प्रत्यक्ष प्रशारण हुने सम्भावना छ ।

बैठकमा  गगन थापा समूहले सभापति शेरबहादुर देउवालाई र्‍याखर्‍याख पार्ने तयारी गरेको छ।  यसअघि निकै आक्रोसित देखिएका अर्का नेता शेखर कोइराला भने यसपटक केही सम्हालिएका छन् ।

मंगलवारदेखि शुरू हुने केन्द्रीय कार्यसमिति बैठकका लागि १० प्रस्ताव तय गरिएका छन् ।

बैठकपछि सञ्चारकर्मीहरुसँग कुरा गर्दै महामन्त्री विश्वप्रकाश शर्माले दशवटा एजेण्डा तय गरिएको जानकारी दिए ।  महामन्त्री शर्माका अनुसार  केन्द्रीय कार्यसमिति बैठकमा समसामयिक विषय, सांगठनिक कार्ययोजना र कार्यतालिका, कार्यसम्पादन समितिका निर्णय अनुमोदन, निर्वाचन परिचालन समितिको प्रतिवेदन प्रस्तुत, नीति अधिवेशन सम्बन्धी खाका, नीति अधिवेशनको मिति तोकिने, विभागहरू थप, गठन र कामको व्याख्या लगायत प्रस्ताव तय भएका छन् ।

बैठकमा राष्ट्रव्यापी अभियानको घोषणासँगै नाम, उद्देश्य, खाका प्रस्तुत हुने, अनुशासन समितिको प्रतिवेदन प्रस्तुत गरिने, प्रतिनिधिसभाका गतिविधिको भूमिकाबारे प्रमुख सचेतकले जानकारी गराउने र सरकारको सहभागिताबारे उपसभापति तथा उपप्रधानमन्त्री पूर्णबहादुर खड्काले जानकारी गराउने प्रस्ताव तय गरिएको  शर्माले जानकारी दिए ।