काठमाडौं । नेकपा (माओवादी केन्द्र) का सांसद लेखनाथ दाहालले पशुपतिनाथ मन्दिरमा सुनको जलहरी राख्ने तत्कालीन प्रधानमन्त्री केपी शर्मा ओलीको निर्णय गलत भएको बताएका छन् ।
सोमवार संसद भवनबाहिर सञ्चारकर्मीहरुसँग कुरा गर्दै उनले यस्तो बताएका हुन् ।
उनले जनता कोरोनाको मारमा परेको बेलामा औषधि उपचार गर्न समेत अफ्ठ्यारो रहेको अवस्थामा पशुपतिनाथमा सुनको जलहरी राख्ने निर्णय वस्तुगत र वास्तविकता भन्दा माथि रहेको बताए । उनले २ सय वर्षदेखि नियमित चाँदीको जलहरी लगाइरहेको ठाउँमा सुनको जलहरी लगाउनुपर्ने आफैँमा वस्तुगत निर्णय नभएको उनको दाबी छ ।
उनले जलहरीको विषयमा निष्पक्षता कामय गरी अनुसन्धान हुनुपर्ने बताए । उनले जलहरी राख्नुको ध्येय स्वर्णाक्षरमा आफ्नो नाम लेखाउनु रहेको बताए । जलहरीमा पूर्वराष्ट्रपति, पूर्वप्रधानमन्त्री, पूर्वमन्त्री लगायतको नाम स्वर्णाक्षरमा लेख्नुले तत्कालीन प्रधानमन्त्री ओलीको ध्येय प्रस्ट हुने बताए ।
‘मैले पशुपतिको जलहरीसँग सम्बन्धित विषयवस्तु उठान गरेको थिएँ । जतिबेला जलहरी लगाउने निर्णय सरकारले गरेको थियो । केपी ओलीजीको सरकारले गरेको थियो, त्यो निर्णय आफैँमा वस्तुगत थिएन । किनभने कोरोनाको महामारी चलिरहेको बेलामा जनता खान नपाएर छटपटाइरहेका थिए’ उनले भने, ‘२ सय वर्षदेखि नियमित चाँदीको जलहरी लगाइरहेको ठाउँमा सुनको जलहरी लगाउनुपर्ने आफैँमा वस्तुगत निर्णय थिएन, मनोगत थियो । अनुसन्धान प्रक्रियामा निष्पक्षता कायम हुनुपर्छ ।’
‘केपी ओलीजीले सुनको जलहरीमा आफ्नो नाम लेख्नुभएको छ । विद्या भण्डारीको नाम, भानुभक्त ढकालको नाम, लगायत धेरैको नाम लेख्नुभएको रहेछ । पशुपतिमा नाम लेखाउने रहर जागेर उहाँले लगाउनुभएको रहेछ । अख्तियारले हात हालिसकेपछि सबै विषय बाहिर ल्याउनुपर्छ’ उनले भने, ‘दाताहरुले दिएको पैसा कति छ ? त्यो पनि चाहिन्छ । बदनियतपूर्ण ढंगले सुनको जलहरी राखिएको रहेछ ।’
सांसद दाहालले जलहरी बनाउन दाताहरुले दिएको रकम उल्लेख नगराइएको भन्दै सबै पक्षहरुको निष्पक्ष अनुसन्धान हुनुपर्ने माग राखे ।
पशुपतिनाथको जलहरीमा नेताज्यूहरुको नाम पो! यो उपयुक्त कुरा भयो र!?? सरकारले जस्तो पनि निर्णय गर्न पाउँछ?? भोलि कसैलाई पशुपतिनाथ बाहिरको बसाहामाथि आफ्नो मुर्ति स्थापना गर्ने लहड जाग्ला । राखीदिने हो कि निर्णय गराएर? कानूनको खिलाफ त हुन्न किन कि कानूनमा त्यसो नगर्नु भनेर लेखिएको छैन क्यारे कतै । त्यसमाथि हाम्रा कतिपय बरिष्ठ मानिएका नेता र मन्त्रिहरुमाथि हत्या आरोप होला । कोही आफूलाई नास्तिक भौतिकबादी भन्ने गरेकाहरु पनि परे होलान नाम लेखाउनेमा । कतै पशुपतिनाथप्रतिको आम आस्था पनि कमजोर हुने हो कि यस्तो कार्यबाट?