दुर्गा प्रसाईंको अभियानमा राजेन्द्र लिङ्देनको विरोध, कमल थापाको समर्थन !

काठमाडौं। पूर्वराजा ज्ञानेन्द्र शाहलाई संरक्षक र साक्षी राखेर व्यवसायी दुर्गा प्रसाईंले सुरु गरेको अभियानमा राजासँग सम्बन्ध बिग्रिएका राप्रपा नेपालका अध्यक्ष कमल थापाले समर्थन र ऐक्यबद्धता जनाएका छन्।

यही अभियानलाई राजासँग सुमधुर सम्बन्ध भएका राप्रपाका अध्यक्ष राजेन्द्र लिङ्देनले भने विरोध गरेका छन्। लिङ्देनले बैंकको पैसा नतिर्ने, तर बैंक कर्मचारी र लघुवित्त सञ्चालकलाई कालोमोसो दल्ने भन्ने प्रसाईंलाई राष्ट्रिय ठगसमेत भनेका छन्।

प्रसाईंले फागुन १ गते पूर्वराजा ज्ञानेन्द्रसहित राजपरिवारका सदस्यको उपस्थितिमा झापाबाट सुरु गरेको अभियानको भोली (शनिबार) काठमाडौंमा घोषणासभा गर्दै छन् । व्यवसायी प्रेमप्रसाद आचार्यले आत्मदाह गरेको स्थानमै उनले सभा गर्न लागेका हुन्।

राप्रपा नेपालका अध्यक्ष थापाले आफ्नो पार्टीका नेता–कार्यकर्तालाई उक्त अभियानमा सहयोग गर्न निर्देशनसमेत दिएका छन्। प्रसाईंले २०४७ सालको संविधान ब्युँताउनुपर्ने लगायतका माग राखेर आन्दोलन नै गर्ने घोषणा गरेका छन् ।

राप्रपा अध्यक्ष थापाले सनातन धर्म संस्कृतिको रक्षाका निम्ति हुने कार्यमा राप्रपा नेपालको सदैव सहयोग र ऐक्यबद्धता रहने उल्लेख गरेका छन्। उनले सामाजिक सञ्जालमा लेखेका छन्, ‘फागुन २० गते काठमाडौंको बानेश्वरमा ‘राष्ट्रियता, धर्म र संस्कृति बचाउने महाअभियान’ द्वारा आयोजित सभा सफल पार्ने काममा सहयोग गर्न राप्रपा नेपालका साथीहरूलाई आह्वान गर्दछु ।’