काठमाडौं। नेकपा एमाले अध्यक्ष केपी शर्मा ओलीले पुस १० गते भएको सम्झौताअनुसार नै प्रधानमन्त्री पुष्पकमल दाहाल प्रचण्डले राष्ट्रपतिमा एमाले उम्मेदवारलाई सहयोग गर्ने दाबी गरेका छन् ।
पार्टी केन्द्रीय कार्यालय च्यासलमा बसेको पार्टी केन्द्रीय सचिवालय बैठकपछि सञ्चारकर्मीहरूसँग कुरा गर्दै अध्यक्ष ओलीले यस्तो दाबी गरेका हुन्। ओलीले प्रधानमन्त्री दाहालले आफूलाई अफ्ठ्यारो परेको र दबाब आएको कुरा गरेको समेत बताए । तर, दबाब कहाँबाट र कसले दिएको ? भन्नेचाहिँ ओलीले केही बताएनन्।
फागुन २५ मा एमाले उम्मेदवार नै राष्ट्रपति निर्वाचित हुने दाबी गर्दै अध्यक्ष ओलीले भने–‘प्रधानमन्त्रीले मलाई दबाब आइरहेको छ भन्नुभयो तर, पुस १० को सम्झौताअनुसार नै एमाले उम्मेदवारलाई सघाउनेमा म विश्वस्त छु।’
अध्यक्ष ओलीले प्रधानमन्त्री प्रचण्डले अलिकति अफ्ठ्यारो पर्यो। मलाई के–के आईपर्यो, दबाब पर्यो भनिरहेको कुरालाई जोड दिँदै, तर सम्झौताअनुसार भोट हाल्ने वचन दिएको समेत बताए । उनले नयाँ आठ दलीय गठबन्धनलाई चियागफ मात्रै भएको समेत बताए ।
‘चिया पिउन जाने सबैले भोट दिन्छन र ?’ उनले प्रश्न गरे–‘कहाँ ८ दलको समर्थन थियो खै मलाई थाहा भएन र चिया खान बोलाए जति सबै भोट हुन्छ?’
नेकपा एमालेले पूर्वसभामुख एवं संविधान सभा अध्यक्ष सुवासचन्द्र नेम्वाङलाई राष्ट्रपतिको उम्मेदवार बनाएको छ । निर्वाचन कार्यालय पुगेर नेम्वाङले उम्मेदवारी दर्ता गराएका छन्।
Facebook Comment
Comment