काठमाडौं। मुग्लिन–नारायणगढ सडकखण्डको पुल निर्माणका लागि सडक बढाउन पहरो काट्ने काम नसकिएकोले अझै १५ दिन सडक बन्द हुने भएको छ । गएको पुस ५ देखि सडक दैनिक ४ घण्टा बन्द गरिँदै आएको थियो ।
उक्त सडकखण्डमा पर्ने चिसेन्जी खोला र तुइनखोलामा पुस ५ गतेदेखि दैनिक ४ घण्टा सडक बन्द गरेर पहरो काट्ने काम भइरहेको थियो । अझै केही दिन काम नसकिएपछि थप १५ दिन बन्द गर्न लागिएको सडक आयोजनाले जनाएको छ।
सडक आयोजनाका अनुसार फागुन ६ गतेदेखि २० गतेसम्म १५ दिन दिउँसो १२ बजेदेखि ४ बजेसम्म सडक बन्द गरेर बाँकी काम पूरा गर्ने तयारी छ । सडक खण्डको कालीखोला, चिसेन्जी र तुइन खोलामा पुल बनाउने काम भइरहेको छ ।
यसअघि नै कालीखोला नजिकको भित्ता काट्ने काम सकेर पुल निर्माण सुरु भएको छ । तर, तुइन खोलाको मुग्लिनतर्फको भीर काट्न गाह्रो भइरहेकोले समय थप गरिएको हो । दैनिक ४ घण्टाको दरले बाटो बन्द गरेर दुई महिना काम गर्दा पनि केही प्रतिशत मात्रै काम भएको आयोजनाको भनाइ छ ।
यो सडकखण्डमा अनक कन्स्ट्रक्सनले पुल निर्माणको काम पाएको छ । पुल बनाउन २०७६ चैत्र १० मा सम्झौता भएको थियो । सडक विस्तार भइसक्दा पनि पुल निर्माण हुन नसक्दा यात्रामा कठिनाइ हुँदै आएको छ ।
Facebook Comment
Comment