अश्लील मोबाइल एप्स बनाएर डाउनलोड गराउँदै ५० लाख चोरी

काठमाडौं। मोबाइल एप्स डाउनलोड गराएर डाटा चोरी गर्दै बैंकको पैसा चोर्ने गिरोह पक्राउ परेको छ। ठगी गर्ने गिरोहले ‘नेपाली गर्ल’ एप्स बनाएर बैंकको सम्पूर्ण विवरण लिएर चोरेर बैंकको एप्समार्फत रकम चोरी गर्ने गरेको पाइएको छ।

उक्त एप्समार्फत् ५० लाख रुपैयाँभन्दा बढी रकम ठगी गरेको आरोपमा जिल्ला प्रहरी परिसर ललितपुरले ८ जनालाई पक्राउ गरेको छ।

पक्राउ पर्नेहरूमा भारतको बिहार प्रदेश सितामढी जिल्ला मधुरापुर–७  बाजपट्टी थानाका २९ वर्षीय अवधेशकुमार, सप्तरीको कृष्णासवरन गाउँपालिका–२ का ३४ वर्षीय दिलीपकुमार चौधरी छन्।

यस्तै पर्साको बिन्दावासिनी–८ का ३३ वर्षीय अजय चौधरी भनिने नगेन्द्र साह कानु, रौतहटको रंगपुर नगरपालिका–१ का २७ वर्षीया रविना चौधरी, बाराको कोल्हवी नगरपालिका–४ का सन्तोष कुँवर छन्। पर्साको वीरगन्ज महानगरपालिका–२५ का २८ वर्षीय राजु पटेल, सोही ठाउँका २० वर्षीय साहिल परबेज र सोही ठाउँका १९ वर्षीय शिवशंकर राउत पनि पक्राउ परेका छन्।

उनीहरूले विभिन्न व्यक्तिको ह्वाट्एपमा ‘नेपाली गर्ल’ नामक एपको लिंक पठाउने र नेपाली युवतीहरू चाहिएको भएमा एप डाउनलोड गर्नुहोस् भन्दै म्यासेज गर्ने गरेका थिए।

उक्त एप डाउनलोड गर्न लिंकमा क्लिक गर्नासाथ मोबाइलमा भएका सम्पूर्ण विवरणहरू उनीहरूले जानकारी लिने गरेका थिए। मोबाइलमा डाउनलोड गरिएको विभिन्न बैंकका एपहरू तथा सेभ गरिएका पासवर्डहरू समेत उनीहरूको मोबाइलमा पुग्ने गरेको थियो। त्यसपछि उनीहरूले रकम आफ्नो खातामा ट्रान्स्फर गर्ने गरेको पाइएको जिल्ला प्रहरी परिसर ललितपुरका एसएसपी शिद्धिविक्रम शाहले जानकारी दिए।

पक्राउ परेको गिरोहले उक्त एपमार्फत् अहिलेसम्म ५० लाख रुपैयाँ ठगी गरेको पाइएको छ। हरिप्रसाद ढकालको एनआईसी एसियामा बैंकमा रहेको खाताको मोबाइल बैंकिङबाट गत मङ्सिर २५ गते र २६ गते ह्याक गरी ४ लाख रुपैयाँ निकालिएको भन्दै प्रहरीमा उजुरी परेको थियो।

७ जनाले यो एप डाउनलोड गरिसकेपछि २६ लाख रुपैयाँ ठगी भएको भन्दै साइबर ब्युरोमा उजुरी दिएका थिए। त्यसैगरी, काठमाडौं उपत्यका अपराध अनुसन्धान कार्यालयमा १२ जनाले २० लाख रुपैयाँ ठगी भएको भन्दै उजुरी दिएका थिए। १ जनाले भने ४ लाख रुपैयाँ ठगी भएको भन्दै ललितपुर प्रहरीमा जाहेरी दिएका थिए।