काठमाडौं । मानव बेचबिखन र बाल यौन दुरुपयोगको मुद्दा खेपिरहेका मनोज कुमार पाण्डेलाई काठमाडौं जिल्ला अदालतले मानव बेचबिखनको मुद्दामा समेत दोषी ठहर गरेको छ । गत जेठ महिनादेखि थुनामा रहेका पाण्डेलाई काठमाडौं जिल्ला अदालतका न्यायाधीश दीपक ढकालको इजलासले मंगलबार दुवै कसुरमा दोषी ठहर गरेको हो । जिल्ला अदालतको यो निर्णयसँगै अब उनी कम्तीमा तीन वर्ष जेल जाने भएका हुन् ।
काठमाडौं जिल्ला अदालतका सूचना अधिकारी दीपक दाहालका अनुसार इजलासले पाण्डेविरुद्धको बाल यौन दुरुपयोगमा ६ महिनाको कैद, पाँच हजार रुपैयाँ जरिवाना र पीडितलाई ५० हजार रुपैयाँ क्षतिपूर्ति भराउने फैसला गरेको छ ।
उनी मानव बेचबिखनको मुद्दामा समेत दोषी ठहरिए पनि फौजदारी कसुर (सजाय निर्धारण तथा कार्यान्वयन ऐन), २०७४ दफा ८ र ९ अनुसार तीन वर्षभन्दा बढी कैद सजाय हुने मुद्दामा छुट्टै सुनुवाइको व्यवस्था अनुसार सजाय निर्धारणका लागि माघ २३ पेशी तोकिएको छ ।
२०७० सालमा एक किशोरीलाई बाल यौन दुरुपयोग गरेको अभियोगमा सरकारले पाण्डेविरुद्ध मानव बेचबिखन र बाल यौन दुरुपयोगको मुद्दा दायर गरेको थियो ।
Facebook Comment
Comment