काठमाडौं। काठमाडौंको चन्द्रागिरि नगरपालिकामा ३३ उम्मेदवारले मनोनयन फिर्ता लिएका छन्।
काठमाडौं प्रवेशद्वारको मुख्य नाकामा रहेको चन्द्रागिरिमा वैशाख ३० गते हुन लागेको स्थानीय तहको निर्वाचनका लागि वैशाख ११ र १२ गते मनोनयन दर्ता गरेका उम्मेदवारमध्ये ३३ उम्मेदवारले शुक्रवार साँझ मनोनयन फिर्ता लिएका हुन्।
चन्द्रागिरिका निर्वाचन अधिकृत सिर्जना थपलियाले १ प्रमुख र २ उपप्रमुखसहित ३३ जनाले मनोनयन फिर्ता लिएको जानकारी दिए। उनका अनुसार मनोनयन फिर्ता लिनेमा नेकपा माओवादी केन्द्रबाट नगरपालिका प्रमुखका उम्मेदवार दिलबहादुर श्रेष्ठ, माओवादी केन्द्रकै उपप्रमुखकी उम्मेदवार रूपा महर्जन र कांग्रेसबाट उपप्रमुखकी उम्मेदवार यमुनादेवी श्रेष्ठ रहेका छन्।
बाँकी ३० वडाध्यक्ष तथा वडा सदस्यका उम्मेदवारले पनि उम्मेदवारी फिर्ता लिएका निर्वाचन अधिकृत थपलियाले जानकारी दिए। चन्द्रागिरि नगरपालिकामा २१ प्रमुख र १० उपप्रमुखसहित ३८७ जनाको उम्मेदवारी परेको थियो।
अब चन्द्रागिरिमा ७७ पदका लागि ३५४ जना प्रतिस्पर्धामा हुन्। काठमाडौं जिल्लाकै सबैभन्दा ठूलो नगरपालिका चन्द्रागिरिमा १५ वडा छन्।
Facebook Comment
Comment