बाइडेन जिनपिङ वार्ताः अमेरिका र चीन सकारात्मक सम्बन्धका लागि तयार

एजेन्सी। अमेरिकी राष्ट्रपति जो बाइडेन र चिनियाँ राष्ट्रपति सी जिनपिङबीच भर्चुअल वार्ता भएको छ।

अति नै महत्वका साथ हेरिएको दुई देशका राष्ट्रपतिबीचको भर्चुअल वार्ता जलवायु परिवर्तन सम्बन्धी पक्ष राष्ट्रहरुबीचको अन्तर्राष्ट्रिय सम्मेलन कोप-२६ को दौरान तय भएको थियो।

वार्ताका क्रममा चिनियाँ राष्ट्रपति सीले ‘अमेरिकासँगको सम्बन्धलाई सकारात्मक दिशातर्फ अघि बढाउन चीन तयार छ’ भनेका छन्।

दुवै देशका राष्ट्रप्रमुखबीच भएको वार्ताअघि के–के विषयमा छलफल गर्ने भन्ने तय गरिसकेपछि वार्ता शुरु भएको थियो। अमेरिकी राष्ट्रपति बाइडेनले जलवायु परिवर्तन सम्बन्धी मुद्दाका अलावा मानव अधिकार र इन्डो प्यासिफिक क्षेत्रका विषयमा चिनियाँ राष्ट्रपतिसँग छलफल गरेका छन्।

यस्तै, चिनियाँ राष्ट्रपति सीले दुवै देशले एकअर्कालाई सम्मान गर्दै ‘हार्दिक सम्बन्ध’ बनाइ राख्नु आवश्यक रहेको बताएका छन्। उनले आफ्ना ‘पुराना साथी’ बाइडेनलाई देख्न पाएकोमा खुशीसमेत व्यक्त गरेका छन्।

वार्ता शुरुवात गर्दै अमेरिकी राष्ट्रपति बाइडेनले ‘हामी दुईबीच आजसम्म औपचारिक हिसाबको सम्बन्ध स्थापना भएको छैन। म हाम्रो सम्बन्धलाई औपचारिक हिसाबमा अघि बढाउन चाहन्छु’ भनेका छन्।

बाइडेनले थप भनेका छन्, ‘हामी दुवैले आजसम्म कुराकानी गर्दा हार्दिकता साथ र अत्यन्तै खुलेर गर्ने गरेका छौँ।’ बाइडेनले अर्को व्यक्तिले के सोचिरहेको होला भन्ने बिन्दुमा आफूहरुले वार्तालाई नछोडेका बताए।

दुई देशबीचको वार्ता सकारात्मक होस् अथवा नकारात्मक, तर एउटा ठोस बिन्दुमा पुग्ने गरेको समेत राष्ट्रपति बाइडेनले स्वीकार गरेका छन्।

यस्तै, बैठकमा चिनियाँ राष्ट्रपति सीले दुवै देशले एकअर्कासँग अझै धेरै ‘संवाद’ गर्न आवश्यक रहेको बताउँदै ‘मिलेर’ समस्याको समाधान खोज्नुपर्ने बताएका छन्। सीले विश्वमा देखिएका जलवायु परिवर्तन, कोभिड-१९ जस्ता समस्याको समाधान गर्न दुवै देश मिलेर काम गर्नुपर्नेमा जोड दिएको बताइएको छ।

‘‘मानवीय विश्व समुदायभित्रै हुन्छ र हामी सबैले विश्वमा देखिएका समस्या एकजुट भएर समाधान गर्नुपर्छ। चीन र अमेरिकाले आगामी दिनमा संवाद र सहकार्यलाई अझ बढाउनुपर्छ’’, राष्ट्रपति सीले भनेका छन्।

साइबर सुरक्षा, व्यापार र निशस्त्रीकरण जस्ता विषयमा दुई राष्ट्रपतिबीचको छलफल केन्द्रित भएको बताइएको छ। यस्तै ताइवानबारे बढ्दै गएको समस्याका विषयमा पनि थप छलफल हुने अपेक्षा गरिएको छ।

बेइजिङले ताइवानलाई आफ्नो भूभागका रुपमा दाबी गर्दै आएको छ भने ताइवानले आफूलाई एक स्वतनत्र देश भएको बताउँछ। यता अमेरिकाले ताइवानको सार्वभौमसत्ताको रक्षाका लागि आफू तत्पर रहेको बताउँदै आएको छ।

गत महीना अमेरिकी राष्ट्रपति बाइडेनले चीनले आक्रमण गरेको अवस्थामा आफू ताइवानको सुरक्षाका लागि कदम चाल्न तयार रहेको बताएका थिए।