काठमाडौं। यस वर्षको १४ कात्तिकसम्म देशभर विपद्का घटनाबाट १ सय २१ को मृत्यु भएको गृह मन्त्रालयले जनाएको छ।
मन्त्रालयको राष्ट्रिय आपत्कालीन कार्य सञ्चालन केन्द्रले दिएको जानकारीअनुसार बाढीपहिरामा परेर अहिलेसम्म २८ जना बेपत्ता भएका छन्।
कूल ४४ घाइते रहेका र १ सय ७९ घर क्षति पुगेको केन्द्रले जनाएको छ। गत ३१ असोजदेखि ३ कात्तिकसम्म परेको अविरल वर्षाका कारण देशभर ठूलो मात्रामा मानवीय र भौतिक क्षति पुगेको छ।
मनसुन बाहिरिएको एक हप्तापछि दुई प्रणाली विकास भई नेपालमा भारी वर्षा भएको थियो। वर्षाका कारण नेपालको पूर्व र पश्चिम क्षेत्र नराम्ररी प्रभावित भएको थियो। ठूला-ठूला पहिराले मानवीय क्षति बढी गराएको हो।
प्राप्त विवरणअनुसार सबैभन्दा बढी ३ कात्तिकमा ६३ जनाको मृत्यु र १९ जना बेपत्ता भएका थिए। ४ कात्तिकमा २९ जनाको मृत्यु भएको थियो भने ५ कात्तिकमा १३ को मृत्यु भएको गृह मन्त्रालयले जनाएको छ।
हराइरहेकाको खोजी जारी रहेको र राहत तथा अस्थायी आश्रयस्थलको व्यवस्थापन जारी रहेको मन्त्रालयले जनाएको छ।
Facebook Comment
Comment