तास खेलिरहेका वडाध्यक्षसहित नौ जना पक्राउ

नुवाकोट। नुवाकोटमा तास खेलिरहेका वडाध्यक्षसहित नौ जना पक्राउ परेका छन्। सूर्यगढी गाउँपालिका-५ का वडाध्यक्ष भैरवबहादुर अधिकारीसहित नौ जनालाई प्रहरीले तास खेलिरहेको समयमा बिहीबार राति पक्राउ गरेको हो ।

जिल्ला प्रहरी कार्यालयबाट खटिएको प्रहरीले बिदुर नगरपालिका-४ स्थित एक होटलमा तास खेलिरहेको समयमा वडाध्यक्ष अधिकारीसहित नौ जनालाई नियन्त्रणमा लिएको प्रहरी उपरीक्षक तुलबहादुर कार्कीले जानकारी दिए।

कार्कीका अनुसार पक्राउ पर्ने अन्यमा बिदुर-१ का कृष्ण विश्वकर्मा, बिदुर-४ का केशवप्रसाद पन्त, बिदुर-५ का नवीन चित्रकार, बिदुर-६ का मच्छिन्द्र परियार, बेलकोटगढी नपा-१० का सन्तोष त्रिपाठी, लिखु गापा-३ का राजु पन्त, दार्चुला घर भएर हाल बिदुर-६ बस्दै आएका पदमसिंह धामी र भारतको मोतिहारी घर भएर हाल बट्टारमा बस्दै आएका ईश्वर गुप्ता रहेका छन् ।

प्रहरीका अनुसार पक्राउ परेका व्यक्तिले हारजित हुने गरेर खेलिरहेको तासको खालबाट १६० पत्ती ताससहित तीन लाख ५२ हजार रुपैयाँ नगदसमेत बरामद गरेको जनाएको छ ।

पक्राउ परेकालाई आवश्यक अनुसन्धानपश्चात् कारबाहीका लागि जिल्ला प्रशासन कार्यालयमा जुवा ऐनमा मुद्दा दर्ता गर्ने प्रहरीले जनाएको छ ।