विद्युतीय बसका लागि पुन: बोलपत्र आह्वान गर्दै बागमती सरकार

मकवानपुर। बागमती प्रदेश सरकारले विद्युतीय बस खरीदका लागि पुनः अन्तराष्ट्रिय बोलपत्र आह्वान गर्ने भएको छ।

प्रादेशिक भौतिक पूर्वाधार विकास मन्त्रालय अन्तर्गतको यातायात व्यवस्थापन बोर्डमार्फत सरकारले बोलपत्र आह्वान गर्न लागेको हो। प्रदेश सरकारले २०७७ चैत १८ मा विद्युतीय बस खरीदका लागि आह्वान गरेको बोलपत्र रद्द गरी पुनः बोलपत्र गर्ने तयारी थालेको हो। बोर्डका निर्देशक जगदीश ढुङ्गानाका अनुसार लागत अनुमानभन्दा बढी रकमको बोलपत्र परेपछि बोलपत्र रद्द गर्नुपरेको थियो। लागत अनुमानभन्दा २९ दशमलव ८३ प्रतिशत बढीको प्रस्ताव बोलपत्रदाताले पेस गरेका कारण रद्द गर्नु परेको निर्देशक ढुङ्गानाको भनाइ छ।

आवश्यक सबै प्रक्रिया सम्पन्न गरी दशैं अगाडि नै बोलपत्र आह्वान गर्न मन्त्रालयसँग सहकार्य भइरहेको जानकारी उनले दिए। उनका अनुसार पहिले आह्वान गरिएको लागत मूल्यमा ३० विद्युतीय बस र १५ चार्जिङ स्टेशनका लागि अन्तरराष्ट्रिय टेन्डर आह्वान गर्न लागिएको हो। हालै मन्त्रालयमा भएको सचिवको हेरफेरले यो काम केही दिन पर सरेकामा अब केही दिनमै बोर्डको बैठक बसेर निर्णय हुने र प्रक्रिया शुरु गरिने निर्देशक ढुङ्गानाले बताए।

बस सञ्चालनका लागि आवश्यक चार्जिङ स्टेशन निर्माणको प्रक्रियासमेत अघि बढाएर मन्त्रालय र बोर्डका प्रतिनिधिले संयुक्त रूपमा विभिन्न जिल्लाको स्थलगत अवलोकन गरेका थिए। बस सञ्चालन हुने मार्गका केही स्थानमा चार्जिङ स्टेशन निर्माण प्रक्रिया शुरु गरिएको छ। बोर्डले काठमाडौंको गोङ्गबु बसपार्क, हेटौंडा बसपार्क, भरतपुरको पारस बसपार्क, धादिङको गजुरी, काभ्रेको धुलिखेल र नुवाकोटको बट्टार तथा विदुर बसपार्कमा चार्जिङ स्टेशन निर्माण प्रक्रिया अघि बढाएको छ।