कांग्रेसको विद्रोही पक्षको भेला जारी, न्यायोचित भागबन्डा नभए विद्रोही उम्मेदवार बन्ने चेतावनी

काठमाडौं। सत्ता गठबन्धनमा सिट बाँडफाँटको विषयलाई लिएर विद्रोहको स्वर चुलिइरहँदा नेपाली कांग्रेसका नेता शेखर कोइराला समूहका विद्रोही नेताहरूको भेला अहिले जारी छ। ठमेलस्थित एक होटलमा चलिरहेको भेलामा भागबन्डा नमिले विद्रोह गर्ने सम्मको रणनीतिबारे छलफल भइरहेको छ।

शीर्ष नेताहरू भागबन्डा मिलाउन दिनहुँ छलफलमा छन्। तर, नेताहरूले सिट बाँडफाँटको टुङ्ग्याउँदै गठबन्धन गठबन्धनको नेतृत्वकर्ता दलमा विद्रोहीको उम्मेदवार भन्नेबारे चर्चा शुरु भएको हो। निर्वाचनका लागि टिकट वितरणमा सभापति शेरबहादुर देउवाले उपेक्षा गरिरहेको भन्दै कोइराला समूहका दोस्रो तहका नेताहरू निरन्तर विद्रोही भेला र कार्यक्रम गरिरहेका छन्।

पार्टीमा ४० प्रतिशत सिट मागिरहेको कोइराला समूहका नेताहरूले समानुपातिक उम्मेदवार चयनमा सभापति देउवाले एकलौटी गर्ने प्रयास गरेको भन्दै विरोध गर्दै आएका छन्। समानुपातिक सूचीमा रहेका नाम सच्याउनुपर्ने उनीहरूको माग छ। विद्रोही गतिविधि गर्दै आएका नेताहरूले सभापति देउवाले बेलैमा पार्टीभित्रको शक्ति समीकरणलाई ध्यान नदिए चुनावमै विद्रोह गर्ने सम्मको चेतावनी दिँदै आएका छन् ।
कोइराला समूहका नेताहरूले विद्रोही गतिविधि गरे पनि नेता कोइरालासहित पदाधिकारीहरू भने सहभागी भएका छैनन्।

ठमेलमा जारी भेलालाई बागमती प्रदेश सभापतिका प्रत्याशी जगदीश्वरनरसिंह केसीले संयोजन गरेका छन्। भेलामा केन्द्रीय सदस्यहरू अजयबाबु सिवाकोटी, प्रकाश स्नेही, प्रतिमा गौतम, मधु आचार्य छन्।  प्रदेश १ सभापतिका प्रत्याशी गुरुराज घिमिरे, कर्णाली प्रदेश सभापतिका प्रत्याशी भुपेन्द्रजंग शाही, धादिङ सभापति रामनाथ अधिकारी, चितवनका पूर्व सभापति जितनारायण श्रेष्ठ लगायत नेताहरू सहभागी छन्।