वरिष्ठताका आधारमा १६ देखि २१ सदस्यीय पदाधिकारी बनाउने प्रचण्डको प्रस्ताव, शनिबार सहमति नजुटे चुनावपछि

काठमाडौं । नेकपा माओवादी केन्द्रको स्थायी कमिटी बैठकमा अध्यक्ष पुष्पकमल दाहाल प्रचण्डले वरिष्ठताका आधारमा पदाधिकारी चयन गर्ने प्रस्ताव गरेका छन् ।

शुक्रबार बिहान बसेको बैठकमा अध्यक्ष प्रचण्डले तीनजना पदाधिकारी पहिले नै तय भइसकेको भन्दै बाँकीमा वरिष्ठताका आधारमा चयन गरेर अघि बढ्न प्रस्ताव गरेका हुन् । सहभागी एक सदस्यका अनुसार बैठकमा प्रचण्डले वरिष्ठ उपाध्यक्षमा नारायणकाजी श्रेष्ठ र उपाध्यक्षमा कृष्णबहादुर महरा चयन भइसकेको भन्दै अब बाँकी पदमा सिनियर साथीहरुलाई समेटेर जाने बताएका थिए ।

प्रचण्डको मौखिक प्रस्तावमा अब उपाध्यक्ष नथप्ने, बरिष्ठताका आधारमा महासचिव तोक्ने र अन्यलाई उपमहासचिव र सचिवमा समेट्ने उल्लेख थियो । त्यसो गर्दा बढीमा २१ जनाको टिम बन्ने भन्दै प्रचण्डले यसमा सहयोग गर्न सदस्यहरुलाई आग्रह गरेका थिए ।

महासचिवमा नाम नतोके पनि वरिष्ठताका आधारमा भनेर प्रचण्डले देव गुरुङलाई संकेत गरेका थिए । प्रचण्डले सबै गर्दा १६ देखि २१ जनाको पदाधिकारी टिम बनाउने समेत बताएका थिए । प्रचण्डको प्रस्तावमाथि केही नेताले धारणा राखेपछि कार्यव्यस्ता देखाएर शनिबार फेरि बस्नेगरी बैठक स्थगित गरिएको थियो ।

शनिबारको बैठकमा प्रचण्डले नाम नै प्रस्ताव गर्ने सम्भावना छ । त्यसमा सहमति जुटेमा पदाधिकारी घोषणा हुने र नजुटे चुनावपछि मात्रै हुने एक सदस्यले बताए । उनले भने, ‘शनिबार अध्यक्षले कंक्रिट प्रस्ताव ल्याएपछि अन्तिम छलफल हुनेछ । सहमति भयो भने पदाधिकारी चयन हुनेछ भएन भने चुनावपछि जान्छ होला “।