चिनियाँ परराष्ट्रमन्त्री वाङ यीको यस्तो छ तीनदिने नेपाल भ्रमण तालिका

काठमाडौं। चीनका स्टेट काउन्सिलर तथा परराष्ट्रमन्त्री वाङ यीको तीनदिने नेपाल भ्रमणको औपचारिक घोषणा भएको छ। परराष्ट्र मन्त्रालयले विज्ञप्ति जारी गर्दै वाङ चैत ११ देखि १३ सम्मको भ्रमण तालिका सार्वजनिक गरेको छ। एमसीसीसँगको सम्झौता अनुमोदन भएको महिना दिनभित्रै उत्तरी छिमेकी चीनका परराष्ट्रमन्त्री वाङ काठमाडौं आउन लाग्नुलाई चासोको रुपमा हेरिएको छ।
भ्रमणका क्रममा वाङले राष्ट्रपति विद्यादेवी भण्डारी र प्रधानमन्त्री शेरबहादुर देउवासँग शिष्टाचार भेट गर्ने कार्यक्रम छ । दोस्रो दिन शनिबार परराष्ट्रमन्त्री नारायण खड्का र वाङको नेतृत्वमा रहेको टोलीले द्विपक्षीय वार्ता गर्ने कार्यक्रम तय भएको छ।
वाङले प्रमुख प्रतिपक्षी एमालेका अध्यक्ष केपी शर्मा ओली र सत्तारूढ दल माओवादी केन्द्रका अध्यक्ष पुष्पकमल दाहालसँग पनि भेट गर्नेछन्।
परराष्ट्र मन्त्रालय स्रोतका अनुसार भ्रमणका अरू एजेन्डा भने अझै तय भइसकेका छैनन् । परराष्ट्र मन्त्रालयले अन्य मन्त्रालयसँग मिलेर एजेन्डाबारे गृहकार्य गरिरहेको छ। साथै, नेपालस्थित चिनियाँ दूतावाससँग समेत समन्वय गरेर द्विपक्षीय वार्ताको तयारी भइरहेको छ ।

यसअघि २०७६ असोज २५ र २६ मा २३ वर्षपछि चीनका राष्ट्रपतिका रूपमा सीले नेपालको दुईदिने राजकीय भ्रमण गरेका थिए । त्यस बेला परराष्ट्रमन्त्री वाङ भ्रमण दलका मुख्य सदस्य थिए।