राक्सिराङ गाउँपालिकामा ६१ प्रतिशतले लगाए खोप

मकवानपुर । मकवानपुरको राक्सिराङ गाउँपालिकामा ६१ प्रतिशत स्थानीयहरुले खोप लगाएका छन्। गाउँपालिकामा खोप अभियानका लागि १८ जना स्वास्थ्य कर्मी खटिएका थिए।

बागमती प्रदेशको राजधानी हेटौंडा बजारबाट नजिकै रहेको यस गाउँपालिकामा यसअघि खोप लगाउनेको संख्या निकै न्युन थियो। गाउँपालिकाले गत माघ २१ गतेबाट खोप कार्ड बिना आउने सेवा ग्राहीलाई सार्वजनिक सेवा नदिने नीति ल्याएपछि भने स्थानीयहरुलाई खोप अभियानमा समावेश गराउन सकिएको गाउँपालिकाका स्वास्थ्य संयोजक विजय कुमार कापरीले बताए।

स्वास्थ्य मन्त्रीको सक्रियता

सरकारले देशभर अभियानका रुपमा खोप सञ्चालन गरिरहँदा राक्सिराङका स्थानीयहरु १५ प्रतिशत पनि खोप अभियानमा सहभागि नभएपछि अभियान नै प्रभावित भएको थियो।

अभियानलाई प्रभावकारी बनाउनका लागि बागमती प्रदेशका स्वास्थ्य मन्त्री निमा लामा स्वयम् गाउँ पुगेका थिए। ‘गाउँपालिकामा खोप लगाउनेको संख्या अत्यन्तै कम रहेको थियो’, कापरीले भने ‘तर अहिले धेरैले खोप लगाईसकेका छन् जुन खुसीको कुरा हो।’

बागमती प्रदेशका स्वास्थ्य मन्त्री निमा लामा कोरोना विरुद्धको खोप लगाउन आग्रह गर्दै राक्सिराङ गाउँपालिका पुगेका थिए। देशव्यापी रुपमा कोरोनाविरुद्धको खोप लगाउने अभियान सञ्चालन भइरहेकै अवस्थामा राक्सिराङका विकट गाउँहरुलाई खोप अभियानमा सहभागि गराउने अभियानसहित मन्त्री लामा समुदायमै खोप लिएर गएका हुन्।

परीक्षण गर्नै आउँदैनन्

मकवानपुरको राक्सिराङ गाउँपालिकामा कोरोना संक्रमितहरु परीक्षण नै गर्न नआउने गरेको पाइएको छ। संक्रमणको लक्षण देखिएपनि स्वास्थ्य संस्था सम्म परीक्षण गर्न नआउने गरेको गाउँपालिकाका स्वास्थ्य संयोजक कापरीले बताए।

पहिलो र दोस्रो लहरको तुलनामा तेस्रो लहरको संक्रमण चाँडो निको भएकाले पनि स्थानीयहरु स्वास्थ्य संस्था आउन नचाहेको उनले बताए।केहि दिनमै लक्षण निको हुने कारणले गर्दा र स्वास्थ्य संस्था आउन टाढा पर्ने भएकाले स्थानीहरु स्वास्थ्य संस्थासम्म धाउने कष्ट नगरेका हुन्।

‘‘गाउँमा जाँदा लक्षण देखिनेहरु धेरै छन् तर जिल्ला स्वास्थ्य कार्यालयले दिने तथ्याङ्कमा राक्सिराङका संक्रमितको संख्या कम देखिन्छ,’’ उनले भने ‘‘स्थानीयहरु पर्ख र हेरको स्थितिमा रहेका छन्।’’

भौगोलिक विकटता प्रमुख कारण भएपनि परीक्षण गराउनुपर्छ भन्ने अशिक्षाका कारण पनि गाउँपालिकावासीहरु परीक्षण गर्न नआउने गरेको कापरी बताउँछन्।

संक्रमणदर उच्च भएपनि वडावासीहरु परीक्षण गर्न स्वास्थ्य संस्था नजाने गरेको गाउँपालिका ३ नम्बर वडा अध्यक्ष बाबुलाल स्याङ्तानले जानकारी दिए। राक्सिराङको तथ्याङ्कमा संक्रमित कम देखिए पनि समुदायस्तरमा कोरोना भाईरस संक्रमण कायम रहेको उनी बताउँछन्।