माओवादी केन्द्रको कारबाहीविरूद्ध सर्वोच्च पुगे फणीन्द्र देवकोटा

नेपालभ्युज

काठमाडौं । ह्वीप उल्लंघन गरेको भन्दै नेकपा माओवादी केन्द्रले गरेको कारबाहीविरूद्ध फणीन्द्र देवकोटा सर्वोच्च अदालत पुगेका छन् ।

गण्डकी प्रदेशसभा सदस्य तथा नेपाल समाजवादी पार्टीका नेता देवकोटाले बिहीबार सर्वोच्चमा रिट दायर गरेका हुन् ।

उनले यही जेठ २८ गते माओवादी संसदीय दलको निर्णयविरूद्ध मुख्यमन्त्री सुरेन्द्रराज पाण्डेलाई विश्वासको मत दिएका थिए । त्यसपछि माओवादी केन्द्रले कारबाही गरेको थियो ।

माओवादीको कारबाही गर्ने निर्णय जेठ ३२ गते सभामुख कृष्णप्रसाद धितालले प्रदेशसभा बैठकमा पढेर सुनाएपछि देवकोटा पदमुक्त भएका थिए ।

देवकोटाले रिटमा माओवादी संसदीय दलले गरेको कारबाही र सभामुख कृष्णप्रसाद धितालले प्रदेश सभामा वाचन गरेको पत्र खारेज गर्न माग गरेका छन् ।