फ्लाई दुबईले भन्यो – विमान उड्ने क्रममा चरा ठोक्कियो, सुरक्षित रूपमा दुबई आउँदैछ

काठमाडौं। त्रिभुवन अन्तर्राष्ट्रिय विमानस्थलबाट उडेको आफ्नो फ्लाइट ५७६ फएजे विमानमा चरा ठोक्किएको फ्लाई दुबईले जनाएको छ। दुबई सरकारको मिडिया कार्यालयको फेसबुकमा पेजमा विमान उड्नेबित्तिकै चरा ठोकिएको स्ट्याटस पोस्ट गरेको छ।

फ्लाई दुबईका प्रवक्तालाई उद्धत गर्दै उसले लेखेको छ, ’फ्लाइ दुबईका प्रवक्ता: काठमाडौं विमानस्थलबाट दुबई अन्तर्राष्ट्रिय विमानस्थल आउँदै गरेको फ्लाई दुबईको फ्लाइट ५७६ फौजेमा काठमाडौंमा चरा ठोक्किएको थियो।’

जहाज दुबई आइरहेको र दुबईको स्थानीय समयअनुसार रातको १२ बजेर १४ मिनेटमा अवतरण हुने दुबई सरकारी मिडिया कार्यालयले जनाएको छ।  नेपाली समय अनुसार राति २ बजे दुबइमा फ्लाई दुबई अवतरण हुनेछ। विमानमा १ सय ६८ यात्री र ७ जना चालक दलका सदस्य गरी १ सय ७५ जना सवार छन्।

काठमाडौं विमानस्थलबाट ९ बजेर २१ मिनेटमा उडान भरेको विमानबाट ठूलो आवाज आएको र आगोको झिल्को देखिएको थियो। लगतै आकस्मिक अवतरणको तयारी गरिएको थियो। विमान सामान्य रहेको भन्दै पाइलटले दुबई लैजाने जानकारी गराएपछि एयर ट्राफिकले अनुमति दिएका थिए।