उपत्यकामा प्रतिघण्टा ५० किमिभन्दा बढीको गतिमा सवारीसाधन गुडाउन नपाइने

काठमाडौं। काठमाडौं उपत्यकामा प्रतिघन्टा ५० किलोमिटर भन्दा बढीको  गतिमा सवारीसाधन गुडाउन नपाइने भएको छ ।

सवारी तथा यातायात व्यवस्था ऐन २०४९ र नियमावली २०५४ मा उल्लेखित गति नियन्त्रणसम्बन्धी व्यवस्थालाई मध्यनजर राखी सवारी दुर्घटना न्यूनीकरण तथा रोकथामका लागि नियमावलीसंशोधन भएको हो ।

कलंकी-कोटेश्‍वर सडक खण्डको फास्ट ट्रयाकमा ५० किलोमिटर र सर्भिस ट्रयाकमा २० किलोमिटर गति तोकिएको उपत्यका ट्राफिक प्रहरी कार्यालयले जनाएको छ ।

यसैगरी, कोटेश्‍वर-भक्तपुर सडक खण्डमा पनि प्रतिघन्टा ५० किलोमिटर गति तोकिएको छ ।

ट्राफिक प्रहरीले उपत्यकाको विभिन्न स्थानमा आवश्यकताअनुसार गति सीमा तोकी सोही स्थानमा गति सीमाका बोर्डहरू समेत राखिएको  जनाएको छ ।

तोकिएको गतिभन्दा बढीमा सवारी चलाउनेलाई ट्राफिक प्रहरीले जरिवाना तथा कारबाही गर्ने जनाएको छ ।