ट्रम्पले लगाए हार्वर्डमा नयाँ विदेशी विद्यार्थीको भिसामाथि प्रतिबन्ध

वासिङ्टन । अमेरिकी राष्ट्रपति डोनाल्ड ट्रम्पले बुधबार हार्वर्ड विश्वविद्यालयमा पढ्न सुरु गर्ने विदेशी विद्यार्थीहरूको भिसामा प्रतिबन्ध लगाउने घोषणा गरेका छन् । यसले उनको प्रशासनको उच्च शिक्षामाथिको कडाइलाई बढाएको छ ।

‘हार्वर्ड विश्वविद्यालयमा अध्ययनको पाठ्यक्रम वा हार्वर्ड विश्वविद्यालयले आयोजना गरेको विनिमय आगन्तुक कार्यक्रममा भाग लिनका लागि मात्र वा मुख्य रूपमा संयुक्त राज्य अमेरिका प्रवेश गर्न खोज्ने विदेशी नागरिकहरूको प्रवेश प्रतिबन्धित गर्न आवश्यक छ भनेर मैले निर्णय गरेको छु,’ ट्रम्पले एक विज्ञप्तिमा भने ।

ट्रम्प प्रशासन शैक्षिक क्षेत्र, त्यसमा पनि विशेषगरी हार्वर्डसँग निरन्तर द्वन्द्वमा रहेको छ । हार्वर्डले भने सरकारको हस्तक्षेप अस्वीकार गर्दै आएको छ ।

ट्रम्पको घोषणाले उनको निर्णय तुरुन्तै लागु हुने र ‘विद्यार्थी र विनिमय आगन्तुक कार्यक्रममार्फत हार्वर्ड विश्वविद्यालयमा पढ्न सुरु गर्न अमेरिका प्रवेश गर्ने वा प्रवेश गर्ने प्रयास गर्ने विदेशीहरूमा लागू हुने बताएको छ ।

विभिन्न भिसामा पहिले नै हार्वर्डमा आएका अन्तर्राष्ट्रिय विद्यार्थीहरूको पनि भिसा रद्द’ हुने जोखिम रहेको विज्ञप्तिमा उल्लेख छ ।

विज्ञप्तिमा ‘राष्ट्रिय सुरक्षा’को रक्षा गर्न यो कदम आवश्यक रहेको बताइएको छ ।

‘मेरो निर्णयमा विदेशी विद्यार्थीहरूले गरेको दुव्र्यवहार र आपराधिकताका ज्ञात घटनाहरूको बारेमा सोध्दा पर्याप्त जानकारी प्रदान गर्न अस्वीकार गर्ने शैक्षिक संस्थाका लागि हाम्रो राष्ट्रको सुरक्षामा अस्वीकार्य जोखिम प्रस्तुत गर्दछ,’ ट्रम्पले भनेका छन् । हार्वर्ड र क्याम्पसहरूमा यसका सम्बद्ध सङ्गठनहरूले मेहनती अमेरिकीहरूलाई समान अवसरहरू अस्वीकार गर्न गरेकोसमेत उनले आरोप लगाएका छन् ।

‘अत्यधिक विदेशी विद्यार्थी भर्नाबाट अमेरिकी विद्यार्थीहरूका लागि अवसरहरू थप कम गरेर गैर–प्राथमिकता प्राप्त जाति, राष्ट्रिय उत्पत्ति, साझा पुर्खा वा धर्महरू विरुद्ध हार्वर्डको भेदभावलाई थप बढाउनु अमेरिकाको हितमा छैन,’ विज्ञप्तिमा भनिएको छ ।

यो आदेश हार्वर्ड विश्वविद्यालयलाई मात्र लागू हुने देखिएको अमेरिकी सञ्चारमाध्यमहरूले जनाएका छन् ।

ट्रम्प प्रशासनको कदम सबै विदेशी विद्यार्थीहरूमाथि लक्षित देखिन्छ । विदेशमन्त्री मार्को रुबियोले चीनका विद्यार्थीहरूका भिसाहरू ‘आक्रामक रूपमा’ खारेज गर्ने वाचा गरेका छन् ।

गत हप्ता विद्यार्थीहरूले स्नातक उतीर्ण गरेपछि एक न्यायाधीशले हार्वर्डलाई अन्तर्राष्ट्रिय विद्यार्थीहरू भर्ना गर्नबाट रोक्न ट्रम्पको प्रयासमा अस्थायी अवरोध सिर्जना गरेका थिए ।