पोखरा थन्डर्सको शानदार जित, चितवनलाई ३-० ले हराउँदै दोस्रो क्वालिफायरमा

काठमाडौं । पोखरा थन्डर्स तेस्रो नेपाल सुपर लिग (एनएसएल) फुटबल प्रतियोगिताको दोस्रो क्वालिफायरमा प्रवेश गरेको छ। पोखराले आइतबार भएको इलिमिनेटर खेलमा एफसी चितवनलाई ३-० को फराकिलो अन्तरले पराजित गर्दै अन्तिम चारमा स्थान सुरक्षित गरेको हो।

पोखराको जितमा विदेशी खेलाडी जो आइडोले दुई गोल गरे भने एक गोल चितवनका डिफेन्डरको आत्मघाती गोलबाट सम्भव भयो। पोखराले यस जितसँगै लिग चरणमा चितवनसँग भोगेको हारको बदला समेत लिएको छ। पहिलो हाफ गोलरहित बराबरीमा सकिए पनि दोस्रो हाफको १३ मिनेटभित्र तीन गोल गर्दै पोखराले चितवनलाई स्तब्ध बनायो। पहिलो पटक प्लेअफमा पुगेको चितवनको यात्रा भने इलिमिनेटरमै टुङ्गिएको छ।

खेलको सातौं मिनेटमा आयुष घलानको पासमा जो आइडोको प्रहारलाई चितवनका गोलकिपर अमल नाइटले उत्कृष्ट बचाउ गरे। १७ औं मिनेटमा सुदिल राईको पासमा आइडोको अर्को प्रयास पोस्ट नजिकैबाट बाहिरियो। २५ औं मिनेटमा चितवनका सुमित श्रेष्ठले पाएको अवसरलाई सदुपयोग गर्न सकेनन्।

पहिलो हाफमा दुवै टोलीले केही राम्रा अवसर सिर्जना गरे पनि गोल गर्न भने असफल रहे। २८ औं मिनेटमा चितवनका भिक्टर मानसारेको पासमा टोरिक जेब्रिनको प्रहारलाई पोखराका गोलकिपर गिल्याम प्रिसोले उत्कृष्ट बचाउ गरे।

खेलको ६३ औं मिनेटमा पोखराले अग्रता लियो। आयुष घलानको शक्तिशाली प्रहारलाई गोलकिपर नाइटले बचाए पनि रिबाउन्डमा समिर तामाङले गरेको क्रस चितवनका डिफेन्डर अभिषेक लिम्बुलाई लाग्दै गोलमा परिणत भयो।

७२ औं मिनेटमा पोखराले अग्रता दोब्बर बनायो। जो आइडोको प्रहार चितवनका जोनाथन क्याम्पबेललाई डिफ्लेक्ट भएर गोलमा परिणत भयो। त्यसको तीन मिनेटपछि चन्दन कुमार दासले बक्सभित्रबाट गोल गर्दै पोखराको जित सुनिश्चित गरे। यो उनको व्यक्तिगत दोस्रो गोल थियो।

८४ औं मिनेटमा चितवनले गोल अन्तर कम गर्ने राम्रो मौका गुमायो। टोरिक जेब्रिनको कडा प्रहारलाई पोखराका गोलकिपर प्रिसोले उत्कृष्ट बचाउ गरे। इन्जुरी समयमा पोखराका नवयुग श्रेष्ठको प्रहारलाई पनि चितवनका गोलकिपरले विफल पारे।

अब पोखरा थन्डर्सले फाइनल प्रवेशका लागि बुधबार धनगढी एफसीसँग प्रतिस्पर्धा गर्नेछ। धनगढी पहिलो क्वालिफायरमा ललितपुर सिटी एफसीसँग २-१ ले पराजित भएको थियो भने ललितपुर अपराजित रहँदै फाइनलमा पुगिसकेको छ।

एफसी चितवन लिग चरणमा तीन जित, एक बराबरी र दुई हारसहित १० अंकका साथ तेस्रो स्थानमा रहँदै प्लेअफमा पुगेको थियो। पोखराले दुई जित, दुई बराबरी र दुई हारबाट आठ अंक जोड्दै गोलअन्तरको आधारमा काठमाडौं रेजर्सलाई पछि पार्दै प्लेअफमा स्थान बनाएको हो। यो सिजन पोखराले सुरुवाती दुई खेल गुमाए पनि उत्कृष्ट पुनरागमन गर्दै क्वालिफायरसम्मको यात्रा तय गरेको हो। गत सिजन पोखरा लिगको शीर्ष स्थानमा रहे पनि क्वालिफायरमा दुवै खेल हार्दै फाइनलमा पुग्न असफल भएको थियो।