साफ महिला फुटबल प्रतियोगितामा सहभागी हुन माल्दिभ्स टोली नेपाल आइपुग्यो

काठमाडौं । साफ महिला फुटबल प्रतियोगितामा सहभागी हुन माल्दिभ्स टोली नेपाल आइपुगेको छ ।

माल्दिभ्सको टोली सोमबार काठमाडौं आइपुगेको हो । अखिल नेपाल फुटबल संघ एन्फा प्रवक्ता सुरेश शाहलगायतका पदाधिकारीहरुले टोलीलाई त्रिभुवन विमानस्थलमा स्वागत गरेका थिए ।

च्याम्पियनसिपमा दक्षिण एसियाका सातै टोली नेपाल, माल्दिभ्स, पाकिस्तान, श्रीलंका, भारत, भुटान र बंगलादेशले सहभागिता जनाउँदै छन् । खेलहरु त्रिपुरेश्वरस्थित दशरथ रंगशालामा हुने तय छ ।

सहभागी टोलीलाई दुई समूहमा विभाजन गरिएको छ । समूह ‘ए’ मा साविक विजेता बंगलादेशसहित भारत र पाकिस्तान छन् । समूह ‘बी’ मा घरेलु टोली नेपाल, भुटान, श्रीलंका र माल्दिभ्स छन् ।

सातौं संस्करणको साफ महिला च्याम्पियनसिप कात्तिक १ देखि १४ गतेसम्म आयोजना हुनेछ।