गठ्ठाघर दुर्घटना : प्रहरीले हान्यो अश्रुग्यास

काठमाडौं । भक्तपुरको गठ्ठाघरमा ट्रकको ठक्करले स्कुटर चालकको मृत्यु भएपछि भिड नियन्त्रणमा लिन प्रहरीले अश्रुग्यास हानेको छ ।

बिहीबार दिउँसो ट्राफिक प्रहरीको चेकिङमा रोकिएको बा ४९ प ८९४४ नम्बरको स्कुटरलाई ना ६ ख २१७३ नम्बरको ट्रकले ठक्कर दिएको थियो ।

स्कुटर चालकको घटनास्थलमै मृत्यु भएको थियो । त्यसपछि स्थानीय बासिन्दाले दुर्घटना हुनुमा ट्राफिक प्रहरीको पनि दोष रहेको भन्दै प्रदर्शन गरेका हुन् ।

प्रदर्शनकारी आक्रामक भएपछि भीड नियन्त्रण गर्न अश्रुग्यास हानेको प्रहरीले जनाएको छ ।

दुर्घटनामा मृत्यु भएको महिलाको नामथर र ठेगाना खुलेको छैन ।

घटनास्थलमा जिल्ला प्रहरी परिसर भत्तपुरका ८० जना र काठमाडौंका ११५ जना प्रहरी परिचालन भएका छन् ।

लोकप्रिय (यो साता)