मौसमका कारण हवाइ उडान प्रभावित

काठमाडौं । मौसमका कारण आन्तरिकतर्फका उडानहरू प्रभावित बन्न पुगेको छ । त्रिभुवन अन्तर्राष्ट्रिय विमानस्थलका अनुसार मध्यान्न १२ बजेसम्म एक दर्जनभन्दा बढी आन्तरिक उडानहरू प्रभावित बनेका छन् ।

चितवन पोखरालगायत ठाउँमा उडान हुन सकेको छैन । समयमा उडान हुन नसक्दा विमानस्थलमा यात्रुको चाप बढेको छ ।

आगमनतर्फ खासै समस्या नभएको विमानस्थलले जानकारी दिएको छ ।

काठमाडौंबाट भरपुर, पोखरा, सिमरा, भैरहवा, नेपालगन्ज र विराटनगर रुटका जहाजहरू उड्न केही ढिलाइ भएको विमानस्थलले जनाएको छ ।

बुद्ध एयरको काठमाडौँदेखि भरतपुरका लागि ८ बजेको उडान तालिका रहेको जहाज खराब मौसमकै कारण उड्न सकेको छैन ।

यती एयरलाइन्सको काठमाडौँदेखि सिमराका लागि ८ बजेकै उडान तालिका रहेको जहाज खराब मौसमकै कारण हालसम्म उड्न सकेको छैन ।

काठमाडौँदेखि पोखराका लागि ९ बजेको उडान तालिका रहेको यती एयरलाइन्सकै अर्को जहाज पनि हालसम्म उड्न नसकेको विमानस्थलले जानकारी दिएको छ ।

बुद्ध एयरको काठमाडौँदेखि पोखरा, काठमाडौँदेखि विराटनगर, काठमाडौँदेखि सिमरा, काठमाडौँदेखि भद्रपुर उडान तालिका रहेका जहाजहरू केही ढिला भएका छन् ।

यी फ्लाइटका यात्रुहरूको बोडिङ पास भइसकेपनि मौसम नखुल्दा उडान हुन नसकेको विमानस्थलले जानकारी दिएको छ ।