काभा भलिबल : नेपालले माल्दिभ्सलाई हरायो, सेमिफाइनलमा इरानसँग खेल्ने

काठमाडौं । काभा महिला नेसन्स लिग भलिबलमा नेपालले माल्दिभ्सलाई पराजित गरेको छ ।

राष्ट्रिय खेलकुद परिषद्‌को कभर्ड हलमा सोमबार भएको लिग चरणको अन्तिम खेलमा नेपालले माल्दिभ्सलाई ३–० को सोझो सेटमा पराजित गरेको हो । अब दोस्रो सेमिफाइनलमा नेपाल र इरानबीच प्रतिस्पर्धा हुनेछ ।

नेपालले माल्दिभ्सलाई पहिलो सेटमा २५–८, दोस्रो सेटमा २५–१९ र तेस्रो सेटमा २५–१८ ले जित हासिल गरेको थियो ।

यसअघि नै सेमिफाइनल पुगिसकेको नेपाल लिग चरणको उपविजेता बनेको छ । ४ खेलमा ३ जित र १ हारको नतिजासहित ९ अंक जोडेर नेपाल लिग चरणमा दोस्रो भएको हो ।

अब नेपालले सेमिफाइनलमा तेस्रो स्थानको इरानसँग खेल्नेछ । अर्को सेमिफाइनलमा शीर्ष टोली भारतले चौथो स्थानमा रहेको श्रीलंकासँग प्रतिस्पर्धा गर्ने छ ।