सुन्दरता र स्वास्थ्यका लागि बदाम तेलको उपयोग

काठमाडौं । कैयौं गुणले भरिपूर्ण बदाम खानामा साथ साथै छालाको लागि पनि अत्यन्त उपयोगी छ । जाडो होस् या गर्मी वा वर्षाको मौसम हरेक रात सुत्नुअघि अनुहारमा बदाम तेलले मसाज गर्दा छालाका धेरै समस्याहरू हट्छन् ।

यसले छालाका दाग–धब्बाहरू हटाउँछ साथै, अनुहारलाई चम्किलो पनि बनाउँछ । पोषक तत्त्वहरूको भण्डार बदाम तेलमा भिटामिन ए, ई, डी, क्याल्सियम, पोटासियम, जिङ्क, आइरन, म्याङ्गनीज, फस्फोरस र ओमेगा–३ फ्याटी एसिड प्रशस्त मात्रामा पाइन्छ ।

बदाम तेलका यी सबै गुणहरू छालाका समस्याहरूको उत्कृष्ट उपचार हो । तपाईंले बदामको तेललाई कुनै पनि मोइस्चराइजिङ लोशनमा मिसाएर अनुहारमा लगाउन सक्नुहुन्छ । राति सुत्नुअघि बदाम तेल लगाउँदा छालामा निखार आउँछ ।

राति सुत्नुअघि बदाम तेलले अनुहारको मसाज गर्नुहोस् । हातहरूमा तेलका केही थोपा लिएर यसलाई आफ्नो सम्पूर्ण अनुहारमा लगाउनुहोस् र हल्का हातले मसाज गर्नुहोस् ।

बदामको तेल छालाका स्ट्रेच मार्क्स हटाउन मद्दतगार छ, किनकि यस तेलमा भएको भिटामिन ई ले छालामा पर्ने चाउरीहरू हटाउँछ ।

बदाम तेल एक प्राकृतिक मोइस्चराइजर हो, जसले सुख्खा र संवेदनशील छालालाई हाइड्रेट राख्छ, विशेष गरी जाडोको सुख्खा हावामा छालालाई बिग्रन दिँदैन ।