राम्रो बन्ने चक्करमा गुमाउनु पर्ला आँखाको ज्योति

काठमाडौं । आजभोलि आँखाको नानीको रङ परिवर्तन गर्नको लागि प्राय मानिसहरू विभिन्न रङ भएको कन्ट्याक्ट लेन्सको प्रयोग गर्छन् । यसले आँखाको सुन्दरतालाई थप बढाउँछ । तर, कन्ट्याक्ट लेन्सका कारणले टीभी अभिनेत्री जस्मिन भासिन कोर्नियाको क्षतिको सिकार भएकी छिन् ।

कन्ट्याक्ट लेन्स लगाएपछि अभिनेत्रीको कोर्नियामा क्षति पुगेपछि उनको आँखामा इन्फेक्सन भएको थियो । यस्तो अवस्थामा प्रश्न उठ्छ कि कन्ट्याक्ट लेन्सले आँखाको ज्योतिलाई हानि पुर्‍याउँछ ? यसबारे जान्ने प्रयास गरौँ-

कन्ट्याक्ट लेन्सको सही प्रयोग नगर्दा यसले आँखाको ज्योतिलाई असर गर्छ । सबैभन्दा पहिले कन्ट्याक्ट लेन्सहरू राम्ररी सफा गरेर राख्नु महत्त्वपूर्ण छ । लेन्सहरू राम्ररी सफा नगरेमा आँखामा इन्फेक्सन हुन सक्छ, जसले आँखाको ज्योतिमा असर पार्छ ।

लामो समयसम्म कन्ट्याक्ट लेन्स लगाउनाले आँखालाई अक्सिजन पाउनबाट रोक्छ, जसले गर्दा कोर्निया अर्थात् आँखाको पारदर्शी भागलाई नोक्सान हुन्छ । यसले आँखामा पोल्ने, दुख्ने र दृष्टिमा कमी आउँछ ।

पौडिँदा वा नुहाउँदा कन्ट्याक्ट लेन्स लगाउनु खतरनाक हुन सक्छ । पानीमा रहेको ब्याक्टेरिया र अन्य कणहरू लेन्समा फसेर सङ्क्रमण निम्त्याउन सक्छन् । यो सङ्क्रमण गम्भीर हुन सक्छ र स्थायी रूपमा आँखाको ज्योतिलाई हानि पुर्‍याउन सक्छ ।

प्रत्येक कन्ट्याक्ट लेन्सको एक निश्चित समय सीमा हुन्छ, जस्तै- दैनिक, साप्ताहिक वा मासिक । यदि तपाईंले निर्धारित अवधिभन्दा लामो समयसम्म लेन्स लगाउनुभयो भने यसले आँखामा क्षति पुर्‍याउँछ ।

कन्ट्याक्ट लेन्स लगाउनाले केही व्यक्तिको आँखा सुख्खा हुन सक्छ । सुख्खा आँखाको समस्यालाई बेवास्ता गर्दा भविष्यमा अझ गम्भीर समस्या निम्त्याउन सक्छ ।

यस्तो समस्या हुन नदिन नियमित आँखा परीक्षण गराउनु महत्त्वपूर्ण छ, विशेष गरी यदि तपाईंले कन्ट्याक्ट लेन्स लगाउनुहुन्छ भने । यसले तपाइँको आँखाको अवस्था र लेन्स प्रयोगको प्रभाव बारे सचेत बनाउन सहयोग गर्छ ।