दुईतिहाइ सांसदको हस्ताक्षर सङ्कलन, प्रधानमन्त्रीको विश्वासको मतलगत्तै ७६ (२) अनुसार सरकार गठनको माग गर्दै शीतल निवास जाने

यता प्रधानमन्त्री पुष्पकमल दाहाल ‘प्रचण्ड’ भने नयाँ सरकार गठनको प्रक्रिया संविधानको धारा ७६ को उपधारा ३ मा पुर्‍याउन उद्यत छन् । उनले दलको पदाधिकारी बैठकमा त्यही ब्रिफिङ गरेका छन् ।

धनबल राई

काठमाडौं । नयाँ सत्ता समीकरणअनुसार दुईतिहाइ सांसदको हस्ताक्षर सङ्कलन भएको छ ।

नयाँ सत्ता समीकरण बनाएर सरकार गठन गर्ने सहमति गरेका दुई ठूला दल नेपाली कांग्रेस र नेकपा (एमाले) का सहित अरु साना दलका सांसदले हस्ताक्षर सङ्कलन गराएका हुन् ।

एमालेका एक सांसदले नेपालभ्युजसँग भने, “दुईतिहाइको हस्ताक्षर तयार छ । बेला हुनेबित्तिकै त्यो सम्बन्धित ठाउँमा पुर्‍याउँछौँ ।”

ती सांसदका अनुसार नेपाली कांग्रेस र नेकपा (एमाले) सहित जनता समाजवादी पार्टी (जसपा) नेपाल, लोकतान्त्रिक समाजवादी पार्टी (लोसपा), नागरिक उन्मुक्ति पार्टी (नाउपा)लगायतले हस्ताक्षर सङ्कलन गराइसकेका छन् ।

ती सांसदको दाबी छ कि त्यसमा राष्ट्रिय प्रजातन्त्र पार्टी (राप्रपा), जनता समाजवादी पार्टी (जसपा), जनमत पार्टीलगायत पनि मिसिने छन् ।

त्यसो त राप्रपा अध्यक्ष राजेन्द्र लिङ्देनले कांग्रेस-एमालेबीचको नयाँ सत्ता समीकरणको स्वागत गरेका छन् ।

यस्तै जनमतले पनि नयाँ सत्ता समीकरणमा मिसिने प्रतिक्रिया दिइसकेको छ । मधेस प्रदेश सरकार उसको नेतृत्वमा छ । जनमतका तर्फबाट नियुक्त मुख्यमन्त्री सतिशकुमार सिंहलाई गत शनिवार कांग्रेस-एमालेले विश्वासको मतसमेत दिइसकेका छन् ।

जनमतका उपाध्यक्ष अब्दुल खान नेपालभ्युजसँग भन्छन्, “हामी नयाँ समीकरणमा रहन्छौँ । त्यहीअनुसार कामहरू हुँदै आएका छन् ।”

यता जसपाले पनि पुष्पकमल दाहाल ‘प्रचण्ड’को सरकार छाडेर नयाँ समीकरणमा मिसिने तरखर थालेको छ ।

यसरी हेर्दा त्यहाँ राप्रपा, जसपा र जनमत पनि थपिने देखिन्छ । त्यसो हुँदा यो समीकरणमा दुईतिहाइभन्दा बढी सांसद देखिन्छन् ।

कांग्रेस ८८, एमाले ७८, राप्रपा १५, जसपा ७, जसपा नेपाल ५, जनमत ५, लोसपा ४, नाउपा ३ लगायतले सबैले हस्ताक्षर सङ्कलन गराए भने सांसद सङ्ख्या झन्डै दुईसय हाराहारी पुग्नेछ ।

प्रधानमन्त्री पुष्पकमल दाहाल ‘प्रचण्ड’ ले असार २८ गते विश्वासको मत लिँदैछन् । तर, मत पाउने सम्भावना भने क्षीण छ । प्रधानमन्त्री प्रचण्डले विश्वासको मत नपाउनेबित्तिकै उक्त हस्ताक्षर शीतल निवास पुर्‍याइने ती सांसदले बताए ।

“प्रधानमन्त्रीले विश्वासको मत नपाउने निश्चित छ । त्यसलगत्तै हामी हस्ताक्षर शीतल निवास पुर्‍याउँछौँ र संविधानको धारा ७६ को उपधारा २ अनुसार नयाँ सरकार गठनको आह्वान गर्न माग गर्छौँ,” ती सांसदले भने ।

तर, अहिले नयाँ सरकार गठन संविधानको कुन धाराअन्तर्गत गर्ने भन्नेबारे बहस चलिरहेको छ । यसमा संविधानविद् नै विभाजित छन् । उनीहरूमध्ये कतिपयले प्रधानमन्त्री प्रचण्डले विश्वासको मत नपाए पनि पुन: उपधारा २ अनुसारकै सरकार बन्ने बताएका छन् । कांग्रेस-एमाले पनि त्यही चाहन्छन् । त्यसैले उनीहरूले केपी शर्मा ओलीलाई प्रधानमन्त्री बनाउने निर्णय गरिसकेका छन् ।

कतिपयले भने प्रधानमन्त्री प्रचण्डले विश्वासको मत नपाउनेबित्तिकै सरकार गठनको प्रक्रिया उपधारा ३ मा पुग्ने जिकिर गर्छन् । अर्को एकथरिले भने उपधारा २ र ३ दुवै बाटो खुला रहेको प्रतिक्रिया दिँदै कुन धाराअन्तर्गत नयाँ सरकार गठन गर्ने भन्ने अधिकार राष्ट्रपतिमा निहीत भएको ठान्छन् ।

तर, दुईतिहाइ सांसदले भने उपधारा २ अनुसार नै सरकार बन्नुपर्ने माग गर्नेछन् ।

नेपालभ्युजसँग माओवादी केन्द्रका सचिव दीनानाथ शर्माले भनेका छन्, “अहिलेका प्रधानमन्त्री उपधारा २ अनुसार नियुक्त हुनुभएको हो । कथम् उहाँले विश्वासको मत पाउनुभएन भने नयाँ सरकार गठनको प्रक्रिया उपारधा ३ मा पुग्छ ।”