अस्पतालबाट शिशु चोर्ने महिलाविरुद्ध अपरहण मुद्दा दर्ता

काठमाडौं । थापाथलीस्थित परोपकार प्रसूति गृह तथा स्त्री रोग अस्पतालबाट शिशु चोरेको आरोपमा पक्राउ परेकी दैलेखको महाबु गाउँपालिका–६ कि मनकुमारी सिंहविरुद्ध प्रहरीले मुद्दा दर्ता गरेको छ ।

बच्चा चोरीको आरोपमा पक्राउ परेकी सिंहविरुद्ध प्रहरीले जिल्ला अदालत काठमाडौंमा मुद्दा दायर गरेको हो । न्यायाधीश माधवप्रसाद अधिकारीको इजलासमा मनकुमारीको बयान भइरहेको छ ।

काठमाडौंको कागेश्वर मनोहरा बस्दै आएकी २७ वर्षीया मनकुमारीविरुद्ध अपहरण तथा शरीर बन्धकको कसुरमा मुद्दा दायर भएको जिल्ला प्रहरी परिसर काठमाडौंको मुद्दा शाखाका डीएसपी अंगुर जिसीले बताए ।

मनकुमारीले अपहरण तथा शरीर बन्धकको कसुर गरेको भन्दै मुलुकी फौजदारी अपराध संहिताको दफा २१३ बमोजिम सजाय माग दाबी गरिएको छ ।

गत फागुन ११ गते काभ्रेकी एक जना महिलाको २६ दिनको शिशु मनकुमारीले चोरी गरेकी थिइन् । प्रहरीले सोही राति १२ बजेतिर काँडाघारीबाट ती महिलालाई पक्राउ गरेको थियो भने शिशुको उद्दार गरेको थियो ।