टुँडिखेलमा सोनाम ल्होसारको रौनक (फोटो फिचर)

काठमाडौं । शनिबार देशभर  तामाङ समुदायले विविध कार्यक्रमको आयोजना गर्दै सोनाम ल्होसार पर्व मनाउँदै छन् । आजको दिन तामाङ समुदायको नयाँ वर्षसमेत हो । यसलाई मञ्जुश्री सम्वत भनिन्छ। आजदेखि मञ्जुश्री सम्वत् २८६० सुरु हुन्छ ।

आजदेखि मुसा वर्ष पूरा भइ गाई वर्षमा प्रवेश हुँदैछ । चन्द्रमास पात्रो अनुसार हरेक वर्ष माघ शुक्ल प्रतिपदाका दिन विभिन्न कार्यक्रम गरी सोनाम ल्होसार मनाइन्छ। मुसा, गाई, बाघ, खरायो, ड्रागन, सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होसारलाई विभाजन गरिएको छ।

ल्होसारमा १२ वटा जीवजन्तुका नामबाट ल्हो खोर्लो अर्थात् वर्ष चक्रका आधारमा हरेक वर्ष पुरानो वर्षलाई बिदाइ र नयाँ वर्षलाई स्वागत गरी धार्मिक र सांस्कृतिक विधिअनुसार तामाङ समुदायले यो पर्व मनाउने गर्दछन्।

सोनाम ल्होसार नेपालका विभिन्न भूभागमा बसोबास गर्ने तामाङसहित ह्योल्मो, थकाली, जिरेल, नेस्याङ्वा, भोटे, दुरा, लेप्चा लगायतले आ–आफ्नो परम्परा अनुसार मनाउने गर्दछन्।