काठमाडौं । प्रतिनिधिसभा सदस्यसमेत रहेका नेपाली कांग्रेसका नेता शंकर भण्डारीको नेतृत्वमा हिन्दूराष्ट्र महाअभियान घोषणा भएको छ ।
महाअभियानको संयोजक भण्डारी तोकिएका छन् भने बाँकी सदस्यहरू तोक्न बाँकी छ ।
महाअभियानलाई पूर्वसभामुख दमननाथ ढुङ्गानाले कानूनीरूपमा सल्लाह दिएका छन् । संयोजक भण्डारीले आफू ढुङ्गानाकै सल्लाहमा संयोजक चयन भएको बताए ।
यसबारे ढुङ्गानासँग बुझ्दा उनले आफू महाअभियानमा नरहेको स्पष्ट पारे । “उहाँहरूले मलाई कानूनी सल्लाह माग्नुभएको थियो । मैले आफूले जाने/बुझेको सल्लाह दिएँ । जस्तो, अहिले धर्मनिरपेक्ष चाहने र नचाहनेगरी दुई कित्ता देखिन्छ । यसमा हिन्दूराष्ट्र महाअभियान घोषणा हुँदा के-कस्तो अवस्था देखापर्छ भनेर संविधानको भेद छुटाएको मात्रै हो मैले, म महाअभियानमा छैन,” उनले नेपालभ्यूजसँग भने ।
उनले थपे, “म फेरि भन्छु, म महाअभियानमा छैन । तपाईंहरूले यही लेख्नुहोला । फेरि छ भनेर लेख्नुभयो भने मैले खण्डन गर्नुपर्छ । मैले सिर्फ एकपटकका लागि सल्लाह दिएको मात्रै हुँ ।”
भण्डारीले भने पहिलेबाटै हिन्दूराष्ट्रको पक्षमा वकालत गर्दै आएका छन् । कांग्रेसको समिति बैठकहरूमा समेत हिन्दूराष्ट्रको पक्षमा बोल्ने गरेका उनले आउँदो फागुन १६ देखि १९ गतेसम्म बस्न लागेको महासमिति बैठकमा पनि एजेन्डा बन्नुपर्ने जोड गर्दै आएका छन् ।
Facebook Comment
Comment