कोशीमा शेखर समूहका नौ सांसदले आङ्बोलाई भोट नहाल्ने, एमालेसँग मिल्ने सम्भावना प्रबल

काठमाडौं । सत्तागठबन्धनले कोशी प्रदेशको मुख्यमन्त्रीमा माओवादीका इन्द्रबहादुर आङ्बोलाई उम्मेदवार बनाउने सहमति गरेको छ ।

तर, नेपाली कांग्रेसबाट चुनाव जितेका शेखर कोइराला समूहका सांसदहरुले भने गठबन्धनको उक्त निर्णय नमान्ने बताएका छन् ।

शेखर कोइराला समूहका ९ जना सांसदहरूले मुख्यमन्त्रीमा आङ्बोलाई भोट दिन नसकिने बताएका हुन् ।

उनीहरुले आफ्नो लाइनका साटो केदार कार्की मुख्यमन्त्रीको उम्मेदवार बनाउनुपर्ने बताउँदै आएका थिए । उनीहरु एमालेसँग मिल्ने सम्भावना बढेको छ ।

कोशीमा प्रदेश प्रमुख परशुराम खापुङले संविधानको धारा १६८ को ५ अनुसार मुख्यमन्त्रीमा दाबी गर्न शुक्रबार साँझ ५ बजेसम्मको समय दिएका छन्।

धारा १६८ (५) अनुसार सरकार गठन हुँदा सांसदहरूलाई दलको ह्वीप लाग्दैन।

पछिल्लो समय शेखर कोइरालाले एमाले अध्यक्ष ओलीसँग निरन्तर संवाद गरिरहेका छन् ।