सुनका गहना चोरी गरेको आरोपमा एक युवती पक्राउ

लमजुङ। सुनका गरगहना चोरी गरेको आरोपमा जिल्ला प्रहरी कार्यालय लमजुङले एक युवतीलाई पक्राउ गरेको छ । पक्राउ पर्नेमा बेसीशहरकी सुजा घिमिरे रहेको प्रहरीले जनाएको छ ।

केही दिनअघि बेसीशहर नगरपालिका-७ को क्याम्पस रोड छेउछाउमा भएको छुट्टाछुट्टै घटनामा झन्डै २३ तोला बराबरको सुनका विभिन्न गहनाहरू चोरी भएको प्रहरीले बताएको थियो । प्रहरीले चोरीको घटना बढ्न थालेपछि सूक्ष्म तरिकाबाट निगरानी बढाउँदा आइतबार घिमिरेमाथि शंका लागी पक्राउ गरेको हो ।

जिल्ला प्रहरी कार्यालय लमजुङका अनुसार पक्राउ परेकी घिमिरेको साथबाट सुनको रानीहार, वाला, औंठी, झुम्का, सुनको रातो पत्थरजडित औंठी, सुनको पत्थर जडित टप, सुनको औंठी दुई/दुई थान र सुनको टप ४ थान मिनिहार, सिक्री र सुनको गणेशको मूर्ति लकेट एक/एक थान फेला परेको छ ।

उनीविरुद्ध चोरी तथा डाँका कसुर शीर्षकमा मुद्दा दर्ता गरी अनुसन्धान भइरहेको प्रहरीले जनाएको छ ।