भदौ २६ गतेबाट ‘नाडा अटो शो २०२३’ हुँदै

काठमाडौं। नाडा अटोमोबाइल्स एसोसिएसन अफ नेपालले हरेक वर्ष आयोजना गर्ने ‘नाडा अटो शो’को २०२३ को संस्करण भदौ २६ गतेदेखि आयोजना हुने भएको छ ।

भदौ २६ गतेदेखि भदौ ३१ गतेसम्म काठमाडौंको प्रदर्शनीमार्गस्थित भृकुटीमण्डपमा अटो शोको आयोजना हुने भएको हो । नाडा अटोमोबाइल्सका अनुसार प्रदर्शनीका लागि बुकिङ पनि खुल्ला गरिएको छ ।

नाडा अटो शो २०२३ मा विद्युतीय लगायतका चार पा‌ग्रे, तीन पांग्रे तथा दुई पांग्रे सवारी तथा ढुवानीका साधनहरू, स्पेयर पाटर्स, टायरट्युब, ब्याट्री, एसेसरिज, अटो कम्पोनेन्ट्स एवं ग्यारेज उपकरणहरूसमेत राखिने छन् ।

त्यसैगरी, सो प्रदर्शनीमा बैंक, इन्स्योरेन्सलगायत ट्राफिक, सडक शुरक्षा र वातावरणसँग सम्बन्धित संघ संस्थाहरू समेतको सहभागिता रहनेछ । झण्डै चार वर्षपछि हुन लागेको यस बृहत् प्रदर्शनीमा एक लाखभन्दा बढी दर्शकले अवलोकन गर्ने र करिब २० अर्बभन्दा बढीको कारोबार हुने अपेक्षासमेत राखिएको छ।