पत्थरीको अप्रेसन गर्न गएका बिरामीको मृत्यु, डाक्टरले किड्नी नै झिकिदिएको आरोप

नेपालभ्युज

धनगढी। धनगढीमा पत्थरीको अप्रेसन गर्न अस्पताल पुगेका एक बिरामीको मृत्यु भएको छ ।

कञ्चनपुरको बेलौरी नगरपालिका १० शिवनगरका ५५ वर्षीय ऐजनलाल चौधरी पत्थरीको अप्रेसन गर्न स्वस्तिक अस्पताल गएकोमा उनको मृत्यु भएको हो ।

भदौ ९ गते शनिबार चौधरीलाई अस्पताल भर्ना गरिएकोमा डाक्टरले बायाँ किड्नीमा रहेको पत्थरीको अप्रेसन गर्दा नशा नै काटिदिएको मृतकका आफन्तले आरोप लगाएका छन् ।

किड्नीको नशा काटिएपछि अत्याधिक रगत बगेको थियो । त्यसपछि डाक्टरले किड्नी झिकिदिएको आफन्तको गुनासो छ । किड्नी झिकेपछि चौधरीको मृत्यु भएपछि डाक्टर ‘सरी’ भन्दै बाहिरिएका थिए।

अस्पतालका अध्यक्ष महेश जोशीले पनि अप्रेसन हुँदा अत्यधिक रक्तश्राव भएको र त्यसलाई रोक्न किड्नी झिकिएको बताए । त्यसले पनि नरोकिएपछि अवस्था बिग्रिएको उनले स्वीकार गरेका छन् ।