दोलखा। अविरल वर्षाका कारण आइतबार दिउसो आएको भेलले बगाउँदा दोलखाको बिगु गाउँपालिका–७ राखामका बाबुछोरा बेपत्ता भएकामा छोरा पासाङ शेर्पाको शव भेटिएको छ ।
आइतबार बिहान घरबाट झण्डै एक घण्टाको दूरीमा रहेको तीनपाटेमा निगुरो टिप्न गएका ३५ वर्षीय बाबु निमदोर्जे शेर्पा र उनका छोरा १२ वर्षीय पासाङलाई वर्षासँगै आएको पहिरोको भेलले बगाएको थियो । निमदोर्जे अझै फेला नपरेको प्रहरीले जनाएको छ ।
यो सातामा उक्त ठाउँमा मात्रै ४ जनाको ज्यान गएको छ भने ३ जना बेपत्ता भएका छन् । अविरल वर्षाका कारण गत मङ्गलबार तामाकोसी नदीमा तितेमाछा टिप्न गएका विगुगापा–२ ओराङका तिरिस तमाङको पहिरोले ज्यान गएको थियो ।
त्यस्तै, गत बिहीबार गौरीशङ्कर गाउँपालिका–७ मार्बु टोपाटारमा गएको पहिरोमा परी सोही स्थानका ५० वर्षीया देवीमाया मगर र १५ महिने नाबालक प्रिन्स थामीको मृत्यु भएको थियो । पहिरोमा परेका स्थानीय ६० वर्षीय कृष्ण मगर र ४९ वर्षीय हरिलाल श्रेष्ठ अझै फेला नपरेको प्रहरीले जनाएको छ ।
रासस
Facebook Comment
Comment