काठमाडौं । काठमाडौं जिल्ला अदालतले नक्कली भुटानी शरणार्थी प्रकरणमा पक्राउ परेका केशव तुलाधरलाई धरौटीमा छाड्न आदेश दिएको छ ।
न्यायाधीश माधवप्रसाद घिमिरेको इजलासले तुलाधरलाई १५ लाख रुपैयाँ धरौटीमा छाड्न आदेश दिएको हो ।
२७ असारमा पक्राउ परेका उनलाई आइतबार जिल्ला अदालत काठमाडौंमा पेश गरिएको थियो । प्रहरीका अनुसार तुलाधरले विभिन्न प्रलोभनमा पारी जाहेरवाला गजेन्द्र बुढाथोकीलगायतका व्यक्तिलाई ठगी गरेका थिए ।
नेपाली नागरिकलाई भुटानी शरणार्थी बनाएर अमेरिका पठाउने प्रकरणमा प्रहरीले बुझाएको प्रतिवेदनका आधारमा जिल्ला सरकारी वकिल कार्यालय काठमाडौंले ३० जनाविरुद्ध जिल्ला अदालत काठमाडौंमा ठगी तथा संगठित अपराधको मुद्दा दर्ता गरेको थियो ।
सोही प्रकरणमा कांग्रेस नेता बालकृष्ण खाँण, एमाले नेता टोपबहादुर रायमाझीलगायत १६ जना हाल पुर्पक्षका लागि थुनामा रहेका छन् भने तीन जना धरौटी बुझाएर रिहा भएका छन् । केही व्यक्ति भने फरार छन् ।
Facebook Comment
Comment