जुम्लामा दलितको घर जलाइएको विरोधमा माइतीघरमा प्रदर्शन

काठमाडौं। जुम्लाको तातोपानी गाउँपालिका–४ गिडिखोलामा अन्तरजातीय विवाहपछि घर जलाइएको विरोधमा काठमाडौंमा प्रदर्शन भएको छ। घटनाको विरोधमा नेपाल समाजवादी पार्टीको नेपाल समाजवादी दलित मुक्ति सङ्गठनले बिहीबार काठमाडौंमा प्रदर्शन गरेको हो।

माइतीघरमा भएको विरोध प्रदर्शनमा नेपाल समाजवादी पार्टीकी नेतृ हिसिला यमी, दलित अधिकारकर्मी, समाजवादी दलित मुक्ति सङ्गठनका सदस्यलगायतको उपस्थिति थियो।

घर–सम्पत्ति जलाइयो, ज्यान जोगाउन भागेका जोडी सम्पर्कविहीन

जुम्ला तातोपानीमा १७ असारमा मुकुन्द नेपालीको घर जलाइएको थियो। उनले स्थानीय बसन्ती गिरीलाई भगाएर बिहे गरेका थिए। दलितले ‘माथिल्लो जातकी केटी भगाएको’ भन्दै मुकुन्दको घर जलाइएको थियो। घर जलाएको आरोपमा केटीका दाजु हिक्मत गिरीसहित तीन जनाविरुद्ध जाहेरी परेको छ।

हिक्मत गिरी पक्राउ परेका छन्। घरमा कोही नभएका कारण मानवीय क्षति भने हुन पाएन। तर, तीन तलाको कच्ची घर र घरभित्र रहेका सबै सामान जलेर नष्ट भयो।

मुकुन्द र वसन्तीले कहाँ बसेर भोग्दै होलान् अन्तरजातीय प्रेमको सजाय ?