उदयपुर। कोशी प्रदेशका सिँचाइ तथा स्वास्थ्यमन्त्री तिलकुमार मेन्याङ्बोमाथि आक्रमणको प्रयास भएको छ । बिहीबार यहाँ भुल्केमा आयोजित एक कार्यक्रममा सहभागी हुन आएका उनलाई पहिचान पक्षधरहरूले आक्रमणको प्रयास गरेका हुन् ।
कोशी प्रदेश नामकरण खारेजीसँगै पहिचानको आधारमा पुन:नामकरणको माग गर्दै आन्दोलनरत घटकहरूले मेन्याङ्बोमाथि आक्रमणको प्रयास गरेका हुन् । उनीहरूले ‘कोशी प्रदेश मुर्दावाद’, ‘कोशी प्रदेश खारेज गर’, ‘पहिचानका आधारमा पुन:नामकरण गर’लगायतका नाराबाजीसमेत गरेका छन् ।
नेकपा (एमाले) को तर्फबाट ताप्लेजुङ प्रदेश सभा १ बाट निर्वाचित मेन्याङ्बो सिँचाइ तथा स्वास्थ्यमन्त्री हुन् । जनता समाजवादी पार्टी (जसपा) की एक्ली सांसद निर्मला तावा लिम्बूले राजीनामा दिएपछि मुख्यमन्त्री हिक्मतकुमार कार्कीले स्वास्थ्य मन्त्रालयको जिम्मेवारी पनि उनैलाई दिएका हुन् । लिम्बू स्वास्थ्यमन्त्री थिइन् ।
मेन्याङ्बो सत्ता साझेदार दल नेकपा (माओवादी केन्द्र) ले समर्थन फिर्ता लिएपछि अल्पमतले परेको कार्की नेतृत्वको सरकारले आन्दोलनरत पक्षसँग वार्ता गर्न गठित वार्ता समितिका संयोजकसमेत हुन् । मेन्याङ्बोसँगै उपसभामुख सृजना दनुवार र प्रदेश स्वास्थ्य सचिव डा. सुधा देवकोटासमेत थिए ।
२०७९ फागुन १७ गते प्रदेश सभाले कोशी नामकरण गरेपछि निरन्तर आन्दोलनरत पहिचान पक्षधर घटकहरूले कोशी प्रदेश नामकरण खारेज नभइन्जेल आन्दोलन नरोक्ने अडान लिएका छन् । आन्दोलनका क्रममा पदम लिम्बू ‘लाजेहाङ’को निधन भइसकेको छ भने सयौं घाइते भइसकेका छन् ।
Facebook Comment
Comment