विद्या भण्डारीले मदनको हत्या हुनु अघि ‘२ जना ड्राइभर’ राखौं किन भनेकी थिइन ?

काठमाडौं। नेकपा एमालेका तत्कालीन महासचिव मदन भण्डारी र स‌ंगठन विभाग प्रमुख जीबराज आश्रीतको आज ३० औं स्मृति दिवस।

२०५० जेठ ३ गते चितवनको दासढुङ्गामा उनी चढेको गाडी त्रिशुली नदीमा खस्यो । उनीसँगै रहेका एमाले संगठन विभाग प्रमुख जिवराज आश्रीतको शव त्यही दिन गाडीसँगै नदीमा भेटियो। चालक अमर लामालाई भने सामान्य चोटपटक समेत लागेन र घट्ना रहस्यमय बन्यो ।

२०६० सालमा चालक लामाको काठमाडौंको कीर्तिपुरमा हत्या भएपछि यो घटना थप रहस्यमय बन्यो तर घटना हत्या कि दुर्घटना भन्ने अझै खुलेन।

मदन भण्डारीकी पत्नी विद्या भण्डारी पार्टी उपाध्यक्ष हुँदै सांसद,रक्षामन्त्री र ७ बर्ष राष्ट्रपति बनिन् । मदनका सहयात्री मनमोहन अधिकारी, केपी शर्मा ओली,माधवकुमार नेपाल र झलनाथ खनाल प्रधानमन्त्री  समेत भए तर पनि मदन-आश्रीतको घटना बारे कुनै चासो लिइएको देखिएन।
मदन भण्डारी अनेरास्ववियुको कास्कीको सम्मेलनमा प्रमुख अतिथि बनेर पोखरा पुगेका थिए। पोखरामा एमाले निकट उद्योगी हरिप्रसाद पान्डेको घरमा खाना खाएर मदन-आश्रीत जेठ ३ गते चितवनका लागि गाडी चढेका थिए ।

चालक अमर लामाले चलाएको गाडीमा तनहुँको आबुखैरेनीसम्म गोरखाका एमाले नेता ऋषि कट्टेल पनि सँगै थिए। आबु खैरेनीमा कट्टेल झरेपछी मुग्लिनमा चिया खाएर भण्डारी र आश्रीत चितवन लागे तर दासढुङ्गामै अस्ताए ।

भण्डारीको गाडी त्रिशुलीमा खसेपछी चालक लामा भने नारायणगढ पुगेर टेलिफोन गरेका थिए। जीपसँगै तीनै जना त्रिशुली खसेको र आफु पौडी खेलेर उत्रेकाे बयान दिएका लामाले नारायणगढको टेलिफोन बुथमा दिएको १० रुपैँयाको नाेट भने भिजेको थिएन भन्ने पसलका संचालकको बयान थियो।

अर्को  रोचक प्रसङ्ग पनि यो घट्नासँग जोडिएको छ। घट्ना हुनुभन्दा २ दिन अघि मदन पत्नी विद्याले गाडीमा दुई जना ड्राइभर राख्न भनेकी थिइन । सामान्यतया निजि गाडीमा २ जना ड्राइभर आवश्यक देखिन्न । भण्डारीले त्यतिबेला पार्टीकै जिप चढ्ने गरेका थिए।

तर, भण्डारी पत्नी विद्याले अमर लामाको चाल चलन ठिक नदेखेर अर्को ड्राइभर राख्न भनेको वा लामासँग बिवाद भएको भन्ने चाहिँ खुलेको छैन। यद्यपि चालक लामाले हात दुखेको र सन्चो नभएको भनेर कहिलेकाहीँ निहुँ खोज्ने गरेका थिए ।

ड्राइभर दुई जना राख्नुपर्छ भन्नुको अर्थमा विद्याले एक अन्तरवार्तामा भनेकीछन्-‘मलाई कता कता डर थियो,अमर लामाले बिरामी छु,हात दुखेको छ जस्ता कुरा गरेको हुँदा मैले त्यसो भनेको थिए । तर,मदनले मैले गर्नुजति गरिसकेँ भनेर सामान्य रुपमा लिइदिए।’

विद्याको बुझाइमा दासढुङ्गा घटनालाई जनताले दुर्घटना मान्न तयार छैनन् । घट्नाको वास्तविकता  ३० बर्षसम्म नखुल्नुमा पनि  विद्याले कुनै कारण बताउन सकेकी छैनन्। उनले ‘हत्या नै गर्नुपर्ने गरि मदनले कसैको केही बिगारेको जस्तो लाग्दैन’ मात्रै भनेकी छन् ।

विद्याले यो घट्नाको रहस्यलाई पर्दाफास गर्ने जिम्मा भविष्यलाई नै छाडिदिनु पर्ने बताउँदै आएकी छिन् ।