दुर्गा प्रसाईंको अभियानलाई सहयोग भन्दै ऋणीबाट एक-एक हजार उठाइँदै (भिडिओसहित)

काठमाडौं । बैंक तथा वित्तीय संस्थाविरुद्ध आन्दोलन थालेका मेडिकल व्यवसायी दुर्गा प्रसाईंको अभियानको लागि खर्च जुटाउन भन्दै लघुवित्तका ऋणीबाट पैसा सङ्कलन गरिएको पाइएको छ ।

आन्दोलनको लागि ठूलो मात्रामा पैसाको आवश्यकता रहेको र आन्दोलनपछि सबैको ऋण मिनाहा हुने भन्दै उदयपुर, सुनसरी, मोरङलगायत जिल्लामा ठूलो मात्रामा पैसा सङ्कलन भइरहेको छ ।

लघुवित्त वित्तीयपीडित संघर्ष समितिका नाममा बेलाका ३ उदयपुरका जयराम माझीलगायतको समूहले रसिद नदिइकन पैसा उठाइरहेका छन् । उनीहरूले आफूहरूसँग ‘अभियन्ता दुर्गा प्रसाईंको कार्यकर्ता’ बताएर आन्दोलनमा सहयोग गर्न भन्दै पैसा मागेको सुनसरीका लघुवित्तका ऋणीहरू बताउँछन् ।

ऋणीहरू भन्छ— “काठमाडौंसहित देशभर ठूलो आन्दोलन भइरहेको छ रे ! आन्दोलनको लागि धेरै पैसा लाग्छ रे, आन्दोलनबाट हामीले लिएको ऋण मिनाहा हुन्छ भन्नुभयो । सबै जनाबाट एक हजारका दरले पैसा उठाएर लैजानुभएको छ ।”

केही सातायता सो समूह प्रदेश १ का विभिन्न जिल्लामा गएर पैसा उठाउन सक्रिय रहेको बताइन्छ । उनीहरूले आइतबार (१२ चैत्रमा) उनीहरूले सुनसरीका लघुवित्तका ग्राहकबाट ठूलो मात्रामा पैसा उठाएका थिए । दुहबी ११ तनमुना पासवान गाउँमा २ सय बढी लघुवित्तका ग्राहकहरूबाट पैसा उठाएको स्थानीय बताउँछन् ।

दुर्गा प्रसाईंले बोली फेरे–‘सक्नेले ऋण तिर्नुस्,नसक्नेले पर्दैन’

५ जनाको समूहमा आएका उनीहरूले लघुवित्त वित्तीय संस्थाबाट कर्जा लिएकाहरूबाट जनही एक/एक हजार रुपैयाँ सङ्कलन गरेका थिए । एकै गाउँबाट उनीहरूले २ लाख रुपैयाँभन्दा बढी सङ्कलन गरेका बताइएको छ ।

लघुवित्तका ऋणीहरूले आफूले पैसा तिरेको रसिद माग्दा उनीहरूले दिएनन् । उनीहरूले ‘अहिले रसिद नदिने, पछि आएर परिचयपत्र दिने’ बताएका नेपालभ्यूजलाई प्राप्त भिडिओमा सुनिन्छ ।

आफूहरू दुर्गा प्रसाईंको आन्दोलनको अभियन्ता भएको भन्दै अपराह्न करिब साढे बजेतिर आएका उनीहरूले देशैभरि लघुवित्त वित्तीय संस्थाकाविरुद्ध लागेको बताएका थिए । नेपाल राष्ट्र बैंकले समेत आफूहरूलाई देशभरिबाट लघुवित्त संस्थाका पीडितको तथ्यांक सङ्कलन गरेर ल्याउन आग्रह गरेकाले आफूहरू आएको उनीहरूले बताएको भिडिओमै सुनिन्छ ।

“देशैभरि वित्तीय संस्थाहरूले ज्यादती छ । नेपाल राष्ट्र बैंकले तपाईंहरूसँग पीडितको डाटा कति छन् ? सङ्कलन गरेर ल्याउनुस् भनेकोले हामी सङ्कलन गर्न आएका हौँ” आफूलाई संघर्ष समितिको कोशी प्रदेशको उपाध्यक्ष भनेर चिनाएका उदयपुर बेलका नगरपालिका ३ जयराम माझीले बताए ।

उनीहरूले नागरिकताको फोटोकपी, फोटो एक प्रतिसहित फारम भराएर रकम सङ्कलन गरेको स्थानीय बताउँछन् । उनीहरूले रकम बुझिलिएको रसिद भने दिएका छैनन् ।

सङ्गठितरूपमा पैसा उठाउनेहरूमा संघर्ष समितिको कोशी प्रदेशको उपाध्यक्ष भनेर चिनाउने माझीसहित उदयपुर नेपालटारका सुजाता राई, गीता बाँस्कोटा, खनार सुनसरीका घनश्याम चौधरी, गढी २ सुनसरीकी मोनिका चौधरी छन् ।

उनीहरूले प्रहरीकै सामने पैसा उठाइरहेको भिडिओमा देखिन्छ । स्थानीयले पैसा दिएको रसिद माग्दा उनीहरूले पछि परिचयपत्र बनाइदिने भनेको सुनिन्छ ।

उनीहरूले पैसा उठाइरहँदा प्रहरीले सामान्य सोधपुछ पनि गरेको देखिँदैन । प्रहरी चौकी तनमुनाका असई ताराकुमार श्रेष्ठ मूकदर्शक बनेका भिडिओमै देखिन्छ । उनीसँगै तनमुना प्रहरी चौकीका अन्य प्रहरीहरू समेत उपस्थित थिए ।

राष्ट्र बैंक भन्छ- पैसा उठाउन कसैलाई पठाएका छैनौँ

नेपाल राष्ट्र बैंकका कार्यवाहक प्रवक्ता नारायण प्रसाद पोखरेलले कुनै पनि व्यक्ति, समूहलाई लघुवित्त पीडितको तथ्यांक सङ्कलन गर्न भनेर नपठाइएको बताए ।

यदि कुनै व्यक्ति समूहले त्यस्तो कार्य गरेको भएमा गृह प्रशासनले तुरुन्त रोक्नुपर्ने बताउँदै उनले कारबाही समेत हुने बताए ।

त्यस्ता व्यक्ति र समूहको विश्वास नगर्न पनि प्रवक्ता पोखरेलले सुझाए । जिल्ला प्रहरी कार्यालय सुनसरीका प्रहरी प्रमुख एसपी प्रभु ढकालले ऋण मिनाहा गराउने बहनामा पैसा उठाएको घटनाबारे छानबिन गर्ने बताए ।