यशु ख्रिष्टको नक्कल गर्न खोज्दा पास्टरको मृत्यु

एजेन्सी। मोजाम्बिकमा यशु ख्रिष्टको नक्कल गर्न खोज्दा एक पास्टरको मृत्यु भएको छ। एक पास्टरले बाइबलमा यशु ख्रीष्टले गरेको कुराको अनुकरण गर्दै ४० दिनसम्म उपवास बस्ने प्रयास गरेपछि उनको मृत्यु भएको हो ।

सान्ता ट्रिन्डेड इभान्जेलिकल चर्चका संस्थापक फ्रान्सिस्को बराजहको अस्पतालमा मृत्यु भएको बीबीसीले जनाएको छ । खाना र पानी बिना २५ दिनपछि उनी उभिन नसक्ने अवस्थामा थिए भने तौल पनि निकै कम थियो ।

सुरुमा अस्पताल समेत जान नमानेका उनलाई बल्लतल्ल अस्पताल पुर्‍याइएको थियो । भोकभोकै २५ दिन वितिसक्दा उनको शरिरका विभिन्न अंगले काम समेत गर्न छाडेका उपचारमा संलग्न डाक्टरहरुले बताएका छन् । मृत्यु भएका पास्टर जिम्बाब्वेको एक सहरमा फ्रान्सेली शिक्षक पनि थिए।

सान्ता ट्रिन्डेड चर्चका सदस्यहरूले पास्टर र उनका अनुयायीहरूका लागि उपवास बस्नु सामान्य कुरा भएपनि लामो समयसम्म केहि नखानु घातक भएको बताएका छन् ।

ख्रिष्टको ४० दिने उपवासको नक्कल गर्ने यस्तो घातक प्रयासको यो पहिलो घटना भने होइन । यसअघि पनि जिम्बाबेमा ४० दिनसम्म उपवास बस्ने क्रममा ३० दिनमै एक व्यक्तिको निधन भएको थियो।