‘सहायक श्रीमान्’ लन्डन माउन्टेन फिल्म फेस्टिभलमा छनोट

काठमाडौं। बहुपति प्रथाको विषयमा निर्माण भएको वृत्तचित्र फिल्म ‘सहायक श्रीमान्’ (को–हजबेन्ड) बेलायतको लन्डन माउन्टेन फिल्म फेस्टिभलका लागि छनोट भएको छ । निर्देशक गणेश पाण्डे फिल्म फेस्टिभलमा छनोट भएको जानकारी दिए ।

फेस्टिभल सन् २०२३ भित्र आयोजना हुनेछ । यसअघि, अमेरिकालगायत धेरै देशका विभिन्न फेस्टिभलमा फिल्मले अवार्ड जितेको थियो । ३५ मिनेटको यो फिल्म कर्णाली प्रदेशको हुम्लामा छायाङ्कन गरिएको हो ।

घरमा जति दाजुभाइ छन्, एउटै श्रीमती बिहे गर्ने संसारकै अनौठो चलन अहिले पनि नेपालका हुम्लालगायत कतिपय हिमाली जिल्लामा विद्यमान छ । सोही विषयलाई निर्देशक पाण्डेले पर्दामा उतारेका हुन् ।

साइन मिडिया प्रालिले निर्माण गरेको यो वृत्तचित्रको लेखन पनि निर्देशन पाण्डेले नै गरेका हुन् ।