सत्ता गठबन्धनको चुनावी अपिलमा जनमोर्चा र लोसपाले किन गरेनन् हस्ताक्षर?

काठमाडौं । सत्ता गठबन्धनमा आबद्ध दलहरूले संविधानको रक्षा, स्थिरता र समृद्धिका लागि गठबन्धनमा  आबद्ध दलहरूलाई मतदान गर्न संयुक्त अपिल गरेपनी केही दलको हस्ताक्षर छैन। गठबन्धनले जारी गरेको अपिलमा राष्ट्रिय जनमोर्चा र लोकतान्त्रिक समाजवादी पार्टी (लोसपा)ले हस्ताक्षर गरेका छैनन्।

नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधवकुमार नेपालको मात्रै हस्ताक्षर रहेको संयुक्त अपिल मार्फत गठबन्धनलाई जिताउन भोट मागिएको छ। पाँच दलीय गठबन्धनमा आबद्ध रहेको राष्ट्रिय जनमोर्चा र लोसपाले भने उक्त संयुक्त अपिलमा हस्ताक्षर भने गरेका छैनन्।

जनमोर्चाका अध्यक्ष चित्रबहादुर केसी छन्। लोसपाका अध्यक्ष महन्थ ठाकुर हुन्। उनीहरूले किन हस्ताक्षर गरेनन् ? गठबन्धनमा असन्तुष्टि भएर हो वा अरू प्राविधिक कारणले ? लोसपा गठबन्धनमा आवद्ध नभएपछि तालमेलमा सहभागी छ । सत्ता पक्षमा रहेका सबै दलले संयुक्त अपिल जारी गर्ने तयारी भएको थियो । तर संघीयताका विषयमा मतभेद भएपछि दुई दल बाहिरै बसेका हुन् ।

राष्ट्रिय जनमोर्चाले संघीयताको विरोध गरिरहेको छ । लोसपा भने कट्टर समर्थक हो । संघीयताको विषय राख्दा जनमोर्चाले नमान्ने र नराख्दा लोसपाले नमान्ने भएपछि दुवै दललाई बाहिर राखेर विज्ञप्ति निकालिएको गठबन्धन स्रोतले जनाएको छ ।

हेर्नुहोस् गठबन्धनको अपिलः